Horti Fair-ah Best Farmer atan Lalneihsanga thlan a ni
Horticulture Fair 2025 hawnna hunah hian Horticulture Minister chuan Horticulture Fair changtlung taka buatsaih a ni thei chu lawmawm a tih thu leh a buatsaihtute hmalakna fakawm a tih thu a sawi a. Mizoram-a tharchhuah thlai, thei leh pangparte, eitur sawngbawl sa (processed food) te zau zawka ram pawna thawnchhuah a nih theih nan Horticulture Department-a mithiamte leh kuthnathawktute an tanruala, an inthlunzawm that tlat a tul thu a sawi a. Mizoram economy tih-changtlungna atan thlai thar sawngbawl (processing) leh a hralhna tur (marketing) ngaihtuah kawngah tanlak nasat angaih thu a sawi bawk.
He hunah hian Mizoram District hrang hrang atanga ‘Best Horticulture Farmer’ atana thlan mi 11 te hnenah chawimawina hlan nghal niin Ser-chhip District atangin Lalneihsanga (Serchhip) chuan he chawimawina hi a dawng a. Serchhip Chhim Veng-a cheng Lalneihsanga (56) S/o Lalkohbika (L) hian Serchhip Zawlpui Phai-ah Acre 4.5-a zau-ah kum 2013 atang khan thlai a ching a, kum 2024-2025 chhung khan Zikhlum, Bawk-bawn, Brocolli, Tomato leh thlai dang an chin atangin sum leh pai tam tham tak an thawkchhuak a ni.
Kum danga tih ngai loh ‘Best Performing Horticulture District’ lawmman pawh kumin hian siam thar a ni a. District titha ber ah Champhai leh Saitual District-te thlan niin, Khawzawl District leh Lunglei District ten an dawt a ni.
Horticulture Fair hian ni 4 (June 17-20, 2025) chhung a awh dawn a. Thlai, thei, pangpar leh a kaihhnawih hmanrua leh processed food-te phochhuahna Stall 205 siam a ni. Horticulture Fair buatsaih tan tirh kum 2012 atanga nikum 2024 thleng khan Horticulture Fair atanga sum hmuh tawh zat chu Rs. 3,46,30,607 a ni.
Comments
Post a Comment
I ngaihdan i sawi hian mipui ngaihdan i tarlang a ni!