Lenkawl

MNF Party President Zoramthanga chuan MNF Party in a din tirh atanga a thil tum ber chu Mizo hnahthlak hmun hrang hrang ami te rorelna khat hnuaia awm a ni, a ti. Nimin-a MNF Party Office Hnam Run-a inkhawm ah MNF President leh Chief Minister Zoramthanga chuan thu sawiin Mizo zawng zawng te rorelna khat hnuaia awm chu MNF dintu ten an thil tum ber a nih thu a sawi a, Foreign lama awm te nen rorelna khat hnuaia awm chu harsa rih deuh mah se India rama State hrang hrang Manipur, Tripura leh Assam State-a Mizo awm te rorelna khat hnuaia awm chu MNF mi hmasa te au hla a nih thu leh hemi atan hian sawrkar laipuiah nasa takin an nawr thu leh remna ziah dawna indawrna ah pawh MNF thu ken lian ber a ni tih a sawi bawk.

Central Building & Other Construction Workers (CB&OCW) Advisory Board Chairman V. Srinivasa Naidu chuan nizan hmasa khan Mizoram Governor Dr. Hari Babu Kambhampati chu Raj Bhavan-ah a kawm.

Serchhip District SP Vanlalnghenga MPS chuan tunhnaia Serchhip-a tualthahna thleng ah pawikhawihtu in dan anga an phu tawk hremna an hmuh theih nan hnu chhui hna theihtawpa an kalpui tur thu sawiin, Hun lo kal zel turah pawh sual dona kawng hrang hrangah khawtlang hruaitute leh mipuite thawhpuina a ngen bawk.

Mizoram Board of School Education chuan kumin a pawl 12 zirlaite tana HSSLC Exam result chu Vawiin hian a tichhuak dawn ta a, www.mbse.edu.in leh www.mbseonline.com-ah te hian en theihin a awm anga, a duh tan a bu lei theih a nih dawn bakah Mobile Phone No. 9863883041 leh 9863722521-ah te zawh theih a ni bawk ang.

Nimin zing khan MNF Adviser J. Malsawmzuala Vanchhawng chuan Serchhip Chanmari MNF Unit-II tlawhin MNF zawm thar mi 45 a lawmlut. MNF Party in thuchhuah siama an tarlan danin heng an party zawm thar an lawm-luh te hi ZPM atangin Voter 14, Congress atangin Voter 25 leh Neutral voter 6 an ni.

Serchhip-a District Agriculture Officer (DAO) Tlangtimawia Zote chu a hna-ah kaisanga Agriculture Department Directorate-a awm tura sawn a nih hnuah Serchhip DAO hna chelh tur hian Lalchharliana chu rawn dah a ni a, amah hi Saitual-a DAO hna chelh mek a nih bakah FOCUS (Saitual)-a DPM hna chelh mek a ni.

Nimin khan Serchhip District-ah COVID-19 hri kai hmuhchhuah belh awm lovin hri kai te zingah mi pathum chu enkawlna hmun atanga chhuahtir an ni thung a, heng te hi East Lungdar khua te vek an ni. Heti hian nimin tlai thleng khan Serchhip District-a COVID-19 hri kai hmuh tawh chu 14,667 niin an zinga 14,622 te enkawl dam an ni tawh a, hri kai enkawllai mi 8 la awmin hri kai zingah mi 37 an boral tawh thung a ni. Serchhip District-a COVID-19 hri kai enkawllai la awm mek te hi East Lungdar khua ah mi 5 bakak New Serchhip,, Thenzawl leh North Vanlaiphai-ah mi pakhat theuh te an ni.

Vawiin Chawhma dar 11:00 hian Serchhip Sub-Hqrs. YMA Coordination Committee (SCC) thutkhawm chu YMA Sub-Hqrs. YMA Conference Hall-ah neih a ni dawn a, Sub-Hqrs. YMA Conference neih zawh taka an thurel bawhzui dan tur leh hmalakna tur hrang hrang te an rel dawn a ni. Kum 2023-2025 chhunga Serchhip Sub-Hqrs. YMA hruaitu turte thlan an nih hnuah SEC Member atan mi 10 ruat an ni tawh a, hei bakah hian Committee peng hrang 12 din leh ni tawh bawkin hruaitu turte pawh inruat a ni tawh bawk a, heng Committee peng hrang hranga Chairman leh Secretary te hi SEC Member an ni nghal bawk a ni.

Manipur tualchhung buaina avanga nimin thlenga Mizoram-a raltlan awm chu mi 6993 an ni a, nimin khan mi 7 chu Manipur lamah an let leh thung a ni. District hrang hrang zingah Ko-lasib District-ah raltlan rawn lut tam berin mi 2426 an awm mek a, Aizawl District-ah mi 2191 awmin Saitual District-ah mi 2187 an awm bawk a. Champhai District-ah 142, Mamit District-ah 19, Serchhip District-ah 18 leh Khawzawl District-ah mi 10 an awm mek bawk a ni.

Aizawl Mission Vengthlang Branch YMA huaihawtin nimin khan Mission Vengthlang Dawrkawn-ah Mission Vengthlang mipuite chuan an veng pa, Lalsangzuala thattu demna lantirin 'Sit-in Demonstration' an nei a, he hunah hian mi thahnem tak pungkhawmin chhun dar 12:00 thleng vel hun an hmang a, an hun hman chhung hian vengchhung dawr zawng zawng an khar bakah tualthattu an demna thu an auchhuahpui bawk a ni.

Mizoram sawrkar Council of Minister thutkhawm chu nimin khan Chief Minister Zoramthanga hovin CM Office-a Cabinet Meeting Room-ah neih a ni a, Department hrang hrang atanga thu pawimawh ngaihtuah tura chhawpchhuah Agenda 23 te an thlirho a ni.

Siaha District chhunga Centrally Sponsored Scheme (CSS) hnuaia nikum (June, 2022 - March, 2023) chhunga hmalakna hrang hrang te thlirin nimin khan Siaha DRDO's District Rural Resource Centre-ah District Development Coordination and Monitoring Committee (DDCMC/DISHA) thutkhawm chu an Chairman leh Lok Sabha MP C. Lalrosanga hovin neih a ni a, Lok Sabha MP chuan Sawrkar Department hrang hrangte chu hunbi ruata hnathawh zawh hman tum theuh tura chahin an rawng-bawlsak mipuite tana theihtawp chhuah theuh turin a fuih nghal bawk a ni.

Nimin khan Champhai-ah Bank hrang hrang kaltlanga Financial Year 2022-2023 March quarter tawp thlenga hmalaknate thlirletin District Consultative Committee (DCC) thutkhawm neih a ni a, he huna tarlan a nih danin March 2023 quarter chhunga Champhai District-a Bank hrang hranga pawisa dahluh leh Loan pekchhuah zat inthlauh dan khaikhinna, Credit Deposit (CD) Ratio chawhrual chu 66.68% a ni a, quarter hmasa December 2022 quarter tawpa CD Ratio 74.56% aiin 7.88% in a tlem a; hei hian CD ratio tha ni tura a hniam lam bituk zat 60% chu a khum tho a ni. Hemi hun chhung hian bank-ah cheng nuai 52399.23 dahluh a nih laiin cheng nuai 34942.40 pekchhuah a ni. Champhai District-ah hian Bank Branch hrang hrang 18 a awm mek a, ATM 9 leh Business Correspondent 10, CSP 1 leh IPPB hnuaia Banking Touch Point 21 te a awm mek a ni.

ZPM Party Working President K. Sapdanga chuan, “Leader atana Pu Duha pawm lo leh Chief Minister atana Pu Duha pawm lo tan ZPM-a awm hi a remchang lo a ni,” a ti.

Mizo ten Arsi chanchin an hriat dan zirchianna puala ni 2 awh tur International Symposium buatsaih chu nimin khan Mizoram Governor Dr. Hari Babu Kambhampati chuan Mizoram University Auditorium-ah a hawng.

Health Minister Dr. R. Lalthangliana chuan kum 2020-2021 atanga National AYUSH Mission hnuaia Medicinal Plants telh a ni ta lo chu pawi a tih thu a sawi.

Central YMA hruaitute chuan Manipur tualchhung buaina avanga Mizoram-a raltlan rawn lut te awmna hmun, Relief Camp te chu nimin khan tlawhin tanpuina an hlan.

Niminpiah zinga Serchhip Bukpui leh Chhiahtlang Chhim Veng inkara Lalsangzuala (31), Mission Vengthlang thihna a mawhphurtu nia rinhlelh Laldinthara (42), Khawruhlian khua nia inchhal chu nimin khan Police ten Aizawl-ah an man a, he pawikhawihna ah hian a inhnam-hnawih thu Police te hmaah a puang tawh nia thu dawn a ni.

Nimin khan Serchhip District-a East Lungdar khua ah COVID-19 hri kai mi 4 hmuh leh niin East Lungdar leh Serchhip AOC Veng-ah mi pakhat ve ve enkawl dam an ni thung a, hri kai enkawllai mi 11 an awm mek a ni.

Manipur tualchhung buaina avangin nimin khan Serchhip-ah raltlan mi 4 an rawn lut leh a, heng te hi Imphal atanga Serchhip Bazar Veng a rawn raltlan niin an zinga mi pathum te chu kum tling lo an ni.