National AYUSH Mission hnuaia Medicinal Plants telh tak loh pawi tih thu Minister in a thlen

Health Minister Dr. R. Lalthangliana chuan kum 2020-2021 atanga National AYUSH Mission hnuaia Medicinal Plants telh a ni ta lo chu pawi a tih thu a sawi.

Nimin leh Vawiin-a neih tur National AYUSH Mission Conclave, Vigyan Bhavan, New Delhi-a nimin a neih ah Health Minister Dr. R. Lalthangliana chuan Mizoram State Medicinal Plants Board in National AYUSH Mission hnuaiah Society 9 (chhungkaw 270) in hlawhtling taka hma an lak thu sawiin, chutihrualin kum 2020-2021 atanga National AYUSH Mission hnuaia Medicinal Plants telh a ni ta lo chu pawi a tih thu a sawi a, telh leh ngei turin sawrkar laipui a chu a ngen a. Mizoram a ramhmul damdawi te zirchiana tih changtlun a nih theih nan North Lungleng-ah Herbal Garden din tum a nih thu a sawi bawk.

Health Minister chuan Mizoram-ah AYUSH Doctor mamawh belhna a nasat thu pawh sawiin, rawtna a neih te a thlen nghal bawk a, AYUSH damdawi mipuiten an hman tangkaia an hriatchian theihna tura rawtna a thlen bawk a. Khum 50 awmna AYUSH Hospital leh khum 10 awmna AYUSH Hospital dinna tur atana Union AYUSH Minister Sonowal-a’n lungphum a rawn phum tawh ho te a rang lama pawisa sanction sak turin a ngen bawk a ni. Heng bakah hian AYUSH damdawi daihzai zawka mipuiten an hmuh theih nan AYUSH Ministry in an lo sawihmuh tawhna hmun hrang hrang - Khawhri leh Muallianpui (Hnahthial District), Zawlpui (Lunglei District), Silsuri (Mamit District), Sangau (Lawngtlai District), Lopu (Siaha Diatrict), Zokhawthar (Champhai District) leh Lungdai (Kolasib District) ah te dah a nih theih nan ruahmanna siam mek a nih thu a sawi bawk.

Commerce & Industry Department changtu Minister ni bawk Dr. R. Lalthangliana hian Ministry of Micro, Small & Medium Enterprises (MSME) Secretary BB. Swain-a pawh hmuin Mizorama Mau hman tangkaina atana Scheme hrang hrangte MSME Scheme hnuaia rin luh dan tur chungchang te a sawipui a. Ministry of Education pawh dawrin Adviser Manmohan Kaur leh Official-te chu RUSA 3.0 an peih har lutuk te leh thil la fel lo te, tRUSA 2.0 pawisa la release kim loh te a rang lama release a, tifel rang turin a ngen bawk a ni.

Health Minister Dr. R. Lalthangliana hi niminpiah tlai khan NITI Aayog Member (Health) Dr. VK Paul chuan zanriah buatsaih sakin inkawmna an nei a, ZMC recognition leh harsatna hrang hrang an neih thinah MCI Chairman a lo nih tawhna anga thurawn tha tak tak a pek thin avangin VK. Paul hi lawmthu a hrilh a ni.