Pawikhawihtu in an phu tawk hremna an hmuh theih nan theihtawp chhuah a ni dawn - SP Serchhip

Serchhip District SP Vanlalnghenga MPS chuan tunhnaia Serchhip-a tualthahna thleng ah pawikhawihtu in dan anga an phu tawk hremna an hmuh theih nan hnu chhui hna theihtawpa an kalpui tur thu sawiin, Hun lo kal zel turah pawh sual dona kawng hrang hrangah khawtlang hruaitute leh mipuite thawhpuina a ngen bawk.

Tunkar Thawhlehni (May 16, 2023) zing-a Serchhip Bukpui leh Chhiahtlang Chhim Veng inkar-a Lalsangzuala (31), Mission Vengthlang Aizawl ruang hmuh a nih chungchang ah Serchhip SP chuan nimin tlai khan an hmalakna te Serchhip-a thuthar thehdarhtute a hrilhfiah a. Serchhip SP chuan May 16, 2023 zing dar 5:45-ah mi tu tih hriat loh ruang chhar a nih thu Serchhip Police Station in an dawn thu leh Chhiahtlang khaw mi nupa feh kal turin NH-54 kawngpui-ah thisen leh mobile phone hmuin lirthei chesual awm ni-ah an ngaih laiin an enchian chuan kawng thlang meter 20 velah mipa ruang an hmu ta mai tih a sawi a. Police lam ten uluk taka an enfiah hnuah tualthahna hnuhma ni ngeiah ngaiin thubuai ziahluh a nih thu leh Mitthi hi Lalsangzuala (31) s/o Lalhmahruaia, Mission Vengthlang, tuna NHIDCL-a Computer Operator hna thawk mek a ni tih finfiah a nih tak thu a sawi a. Lalsangzuala Motor (Bolero MZ-01U 9639) chu Chhiahtlang khawchhung YMA Run bulah kawng sirah thing chhehkhawmah tlan lawmin hmuh a ni bawk tih a sawi a ni.

Serchhip SP chuan he pawikhawihna chhuizuitu tur bik Special Investigation Team chu Serchhip SDPO Kaste Romalsawma kaihhruaina hnuaiah din nghal a ni tih sawiin, uluk taka an chhui hnuah Police Station hrang hranga thubuai engemaw zat nei mek Laldinthara (42) chu tualthattu ni ngeia hriat a nih tak thu leh SIT mi ten Inspector VL. Ramhluna hova Aizawl panin Aizawl District Police te puihnain May 17, 2023 khan rinhlelh hi an man thu leh hemi ni tlai dar 5:10 khan dan hmaah a chungthu rel turin Central Jail-ah dahluh nghal a nih thu a sawi a ni.

Tualthattu nia hriat chhuina leh manna kawngah khawtlang mipui, khawtlang hruaitu leh YMA te puihna bakah an hotu sang atanga fuihna an dawn that thu Serchhip SP chuan he hunah hian sawiin, lawmthu a sawi a. He pawi khawihtu hian Dan anga a phu tawk hremna a hmuh theih nan an theihtawp an chhuah dawn tih sawiin, a tul ang zela anmahni thawhpui tur leh an hnathawh tibahlah thei tur thu belhchian dawl lo leh midangte ti chi-ai thei thehdarh lo turin mitinte a sawm a. He thil ah hian midang inrawlh ve an awm lo nia a lan thu a sawi bawk.

Serchhip SP chuan hetiang thil a lo thlen hian pawikhawihtu awlsam zawka chhui a nih theih nan leh an phu ang hremna pek an nih theih nan pawi khawihna hmun (Crime Scene) vawn-him that a pawimawh thu a sawi a. Crime Scene vawnhim that a nih chuan hnu chhui a awlsam phah thu sawiin, tun tumah pawh hian Aizawl atangin Forensic lama mithiam te rawn kalin Sample an lak hrang hrangte nen thubuai hi an bawhzui tur thu a sawi a, hun lo kal zel turah pawh hei hi mipui ten hriat sak se a duh thu a sawi bawk a ni.

He hunah hian SIT kaihruaitu Serchhip SDPO Kaste Romawlsawma pawhin hnu an chhui dan hrang hrangte sawiin, pawikhawihtu a puh hun hun engemaw chen Serchhip leh Then-zawl-a lo khawsa tawh nia hriat a nih thu a sawi a. Serchhip Addl. SP Saidingliana Sailo pawhin pawikhawihtu leh a tuartu hi in hre ngai lo leh intawng chawp nia an lan thu sawiin, hetiang thil a thlen changa Social Media lama thu dik tawk lo lo thehdarh a ni thin chu pawi a tih thu leh tun tuma thu diklo thehdarh pawh chhui zui a nih tur thu a sawi bawk a ni.