Mizo ten Arsi chanchin an hriat dan zirchianna pual International Symposium Governor in hawng

Mizo ten Arsi chanchin an hriat dan zirchianna puala ni 2 awh tur International Symposium buatsaih chu nimin khan Mizoram Governor Dr. Hari Babu Kambhampati chuan Mizoram University Auditorium-ah a hawng.

Mizoram University (MZU)-a Dept. of Physics leh Mizoram Science Centre, Directorate Of Science & Technology ten an buatsaih ‘International Symposium on the History of Astronomy of the Mizo People’ hawnna ah hian Governor chuan Arsite chanchin hian mihringte nunah hmun lairil tak an luah a, hmakhawsang atang tawhin khawvel hmun hrang hranga chengten an hnam mil ang zelin Arsite thawnthu an nei tawh thin tih a sawi a. India ram mi te ngei pawh hian mithiam Aryabhatta hun atang tawhin thuk takin an nun nen inzawmna neiin an lo ngai tawh thin tih sawiin, hetiang ang Hnam ziarang nen inzawm tlat thilhlui ngaihhlutna hi lo tlahniam zelin, thangtharte hian vawnthatna kawngah hmalak reng a ngai a ni, a ti.

Governor chuan Mizo p leh pu ten arsi an lo hriat dan te vawnhim anih theih nana hmalatu Physics Dept., MZU leh Mizoram Science Centre te chu fakawm a tih thu sawiin, Science Centre chu theihtawp chhuah a tan la chhunzawm zel tura a chah bakah thangthar te zingah Arsi chanchin leh Van thengreng chanchin zir chakna tuh tura hma la zel turin a chah a. Tunlai thangtharte chu Digital Media leh Internet hmangin thil thar chi hrang hrangin an nun a deng mek a, hetihlai hian mahni hnambil ziarang leh pawmdante vawnthata hlanchhawn anih zel theihna turin upa zawk te leh zirtirtu ten mawh an phur a, tan an lak a ngai tih a sawi bawk.

He International Symposium-ah hian Dr. Martin George, Principal Astronomer, Hive Planetarium, Tasmania, Australia and Chair of International Development, International Planetarium Society chuan he hun hun an buatsaih chhan te sawiin, Arsite leh vansang lam chanchin chu mi zawng zawng huapzo anih thu leh mihringte thinlung nen inhnaih tak a nih thu a sawi bawk.

Ni hnih awh tur he Symposium-ah hian Mizoram chhung leh pawn atangin mithiam thlanbik ten Technical Session vawi 4 neiin thupui zirna leh sawihona hun an hmang dawn a. Dr. Martin George pawhin zirlaite hmaah astronomy tihlarna turin thupui a sawi bawk ang. Symposium hi Mizoram Science Centre Berawtlang-ah chhunzawm a ni anga, Dr. Martin George kawmna leh Planetarium tlawhnate neih a ni bawk dawn a ni.