Tualthattu nia puh Police ten an man nghal; Police hmaah pawikhawihtu a nih thu a puang

Niminpiah zinga Serchhip Bukpui leh Chhiahtlang Chhim Veng inkara Lalsangzuala (31), Mission Vengthlang thihna a mawhphurtu nia rinhlelh Laldinthara (42), Khawruhlian khua nia inchhal chu nimin khan Police ten Aizawl-ah an man a, he pawikhawihna ah hian a inhnam-hnawih thu Police te hmaah a puang tawh nia thu dawn a ni.
Thudawn danin Lalsangzuala thihna chungchangah hian Serchhip Police Station-ah thubuai ziahluh a nih hnuah Serchhip SDPO Kaste Romalsawma kaihhruaina hnuaiah Special Investigation Team (SIT) din nghal a ni a, an theih anga an chhui zui hnuah nimin khan he thihna thlenga mawhphurtu ni ngeia hriat Laldinthara hi Aizawl-ah SIT te hian Aizawl District Executive Force te nen tangtlangin an man a, Serchhip atangin Serchhip Police Station OC Inspr. VL. Ramhluna hovin thawktute an kal a ni.

Thudawn danin Laldinthara hian tualthahna thlen zing khan Aizawl pan tur Maxi Cab chu Chhiahtlang leh Lamchhip inkar ramhnuai ah lo pharin Aizawl a pan a, a khawsak zia ah rinhlelh a nih bakah a pheikhawk bun chu Lalsangzuala ta ni ngeia hriat a ni bawk a, hei vang hian Serchhip Police te chuan thu zawhfiah tura man tumin nimin khan Aizawl an pan ve nghal a, Aizawl lama an thawhpuite nen tang tlangin nimin vek khan man nghal a ni a, Police hmaa a inpuan hnuah nimin khan Laldinthara hi Central Jail-ah dahluh nghal a ni.

Pawikhawihtu a puh Laldinthara hi Serchhip-a awm nghet lem lo, khawsakna nghet pawh nei lem lo leh vak rawlai thin niin kan thudawnna pakhat chuan a sawi a, pawikhawihna a thlen zan khan Lalsangzuala nen hian intawngin an inkawm a, Chhingchhip lama thlah tura a tih chu an inkawm rei hnuah Lalsangzuala hian a peih leh tak loh avangin kut a thlak ta niin kan thudawnna chuan a sawi bawk. Laldinthara hian lirthei khalh ngai lo chungin Lalsangzuala Bolero hi khalh zuiin thui pawh a kalpui thei lova, ke in a tlanchhe zui ta nia thudawn a ni. Laldinthara hian kar hmasa khan Serchhip-ah Mobile Phone a lo ru tawh bawk nia thudawn niin hei hi a phone neitu ten thubuai ah an siam loh avangin chhuah leh a ni thung a ni.