Serchhip-ah MNF zawm thar mi 45 lawmluh an ni

Nimin zing khan MNF Adviser J. Malsawmzuala Vanchhawng chuan Serchhip Chanmari MNF Unit-II tlawhin MNF zawm thar mi 45 a lawmlut. MNF Party in thuchhuah siama an tarlan danin heng an party zawm thar an lawm-luh te hi ZPM atangin Voter 14, Congress atangin Voter 25 leh Neutral voter 6 an ni.

He hunah hian MNF Adviser J. Mal-sawmzuala Vanchhawng chuan MNF party chu dinna nghet tak leh thuthlung nghet tak nei anih avangin mi zawng zawng tan belhtlak a ni tih sawiin, Party mipuite chu an thil tih apiang mipuite tana rawngbawlna pawimawh a ni tih vawng reng turin a chah a, mi dangte elsenna leh diriamna ang chi laka inthiarfihlim tura chah bawkin, hetih rual hian thudik tluantling lo hmanga MNF sawrkar beihna a nasat avangin zawldawh tak leh thuhnuairawlh tak chunga thu dik zawk sawi-fiah thin tur leh sawrkar hmalakna te midangte hrilhfiah kawngah tan la thar turin a chah a ni.

Hei bakah hian Mizoram in harsatna a tawh apianga tawngtai sak thintu leh a tul apianga penchhuak thin Kohhran ho kan nei te, sawrkar hmalakna nghet taka thlawp tlat thin NGO leh zirlai pawl kan neite chu kan vanneih bik zia mipuiten kan chhut nawn fo a that thu MNF Adviser chuan a sawi bawk.