Central YMA in Relief Camp an tlawh; MZP leh ITLF ten Tuivai Lei siamthat pawimawh an ti

Central YMA hruaitute chuan Manipur tualchhung buaina avanga Mizoram-a raltlan rawn lut te awmna hmun, Relief Camp te chu nimin khan tlawhin tanpuina an hlan.

Manipur atanga raltlante hi Central YMA in an awmna hmun ngeia thlamuan tur leh tanpuina pe tura tlawhchhuah vek nise tih a rel angin nimin khan Kolasib District chhunga raltlante chu an awmna khaw hrang hrangah Central YMA hruaituten an tlawh a. Central YMA Office Bearer leh CEC Member te chu hlawh thum-ah inthenin, Bairabi, Saipum leh Vairengte-a raltlan awmte an tlawh a, Branch YMA ten an huamchhunga raltlante tan vehbur an khawn sak leh Mizoram hmun hrang hranga mi inphal ten Raltlante puala tanpuina an pek chu an sem nghal a ni. He hunah hian Central YMA President R. Lalngheta chuan an unau ten an tawrhna chu hrehawm an tih thu leh an tawrhpui hle tih hre turin a chah a, hmun hrang hrang atanga rawn raltlan te chu Zofate Inpui, Mizoram-ah thlamuang taka awm tura chahin, an neih ang ang eiin an in za anga, riltam in awm lo ang tih hre turin a chah a, Mizoram mipuite pawh an dinhmun hi hriatpuia an theih anga tanpui tura che chhuak turin a sawm bawk a ni.

Hetihlai hian Mizo Zirlai Pawl (MZP) General Headquarters, Aizawl leh Indigenous Tribal Leaders Forum (ITLF), Manipur chuan nimin khan inkawmhona neiin Manipur-ah ei leh bar lakluh a harsat loh nan Tuivai leh siamthat/thawmthar a pawimawh thu an sawi a. MZP Pisa Pui, Aizawl-a pawl pahnih te inkawmnaah Manipur buaina intan dan leh he buaina avanga Zofate tawrhna chungchang sawiho niin ITLF chuan, Manipur Zofate’n ei leh barah harsatna an tawh mek thu an sawi bakah ei leh bar lakluhna atana pawimawh Tuivai lei chu Fur ruahtui tlak hmaa siamthat a, thawmthat an duh thu an sawi a ni. ITLF chuan buaina an tawh lai a an ngaihsakna leh an buaipuina avangin Mizoram Sawrkar, Mizoram mipui leh MZP te chungah lawmthu sawiin, he buaina hian Zofate inkarah inunauna tha zawk thlen se an duh thu an sawi a. MZP pawhin Manipur buaina avanga Zofate tawrhna an hriatthiampui thu leh pawi an tih thu sawiin, an tan theihtawp an lo chhuah tawh angin a tul anga tanpui zel an tum thu an sawi bawk a ni.