Lenkawl

PHE Department in Serchhip chawmna atana Tuikum atanga Tui an pump na, Electric khawl chu Inrinni khan chhe lehin Pathianni leh nimin khan nileng in siamthat tuma hmalak nghal a ni a, nizan khan enchhinna neih tum a ni. PHE Department hotute chuan tunah hian Diesel khawl hman theih mah se Oil leh thildang a hautak avang leh a khawl a chak avangin Pipeline in a zo thin lova, hei vang hian rinpui ber-ah neih theih a ni lo tih an sawi a, Electric khawl an hman pawhin mipuite tui mamawhna a san tawh avangin Diesel khawl hi ni khat-ah darkar 6-8 vel hman a ngai tho niin an sawi.

Serchhip Sailiamkawn atanga NH. 54 hel-a Dawngzawl kalna kawng chu lirthei zawh theih tura peihfel a ni ta.

MHIP Sub-Hqrs. Serchhip chuan tunhnaia Hmeichhe naupang khuaikhemna thleng chu an dem thu leh pawi an tih thu an sawi. Hemi chungchanga thuchhuah an siamah MHIP Sub-Hqrs. Serchhip chuan hmeichhe naupang kum 5 mi khuaikhem chungchang thu lungchhiatthlak tak chu youtube kaltlanga an lo hriat ve thu hi tarlangin, he thil thleng chungchangah hian Nov. 5, 2022 khan Executive Committee an neih thu leh he hmeichhe naupang khuaikhemna hi an demin pawi an ti takzet tih an tarlang a. Tun hnuah hetiang thil hi thleng tawh lo tura an duh thu leh a tuartu pawh an lainat thu an tarlang a. Hmeichhe naupang rilru thianghlim leh pawi sawi lo chunga pawi khawihtu hi a phu tawk hremna pe ngei tura thuneitute an phut thu an tarlang bawk.

Central Pollution Control Board chuan Single Use Plastic khapna kalpui meka sawi duh nei, Complaint neite tan Mobile Application a siam a. Mipui a duh apiangten an hmang tangkai thei a ni. Hemi chungchanga sawi duh neih te chuan https://play.google.com/store/apps/details?ud=com.supcpcb-ah download theih a ni ang.

Nimin tlai thleng khan Serchhip District-ah COVID-19 hri kai enkawllai mi pakhat a la awm. Nimin khan Serchhip District-ah COVID-19 hri kai hmuh belh awm lovin hri kai enkawl zinga mi pathum te chu anmahni enkawlna hmun atanga chhuahtir an ni a, heng hri kai chhuahtir tak te hi Ramlaitui khuaa mi pahnih leh Ngen-tiang khuaa mi pakhat te an ni. Heti hian nimin tlai thleng khan Serchhip District-a COVID-19 hri kai hmuhchhuah tawh chu 14,615 niin an zinga 14,578 te chu enkawl dam an ni tawh a, hri kai hmuhchhuah atanga za zela 99.73 te enkawl dam ni tawhin hri kai enkawllai mi pakhat a la awm a, Lungchhuan khuaa hri kai hmuh niin hri kai zingah mi 36 an boral tawh a ni.

Nimin khan Siaha-ah SUPs Enforcement Team te chuan Siaha khawpui chhunga Dawr hrang leh Market-ah te Single-Use Plastics (SUPs) zawrh leh hman a ni em tih enfiah hna an thawk a, hman khat daih Plastic zuar leh hman tur lo kawl te chu an man sak bakah Rs. 10,000/- chawitir zel tura tih an ni. Hman khat daih Plastic hman leh zawrh hi kumin July 1 atang khan rampum ah khap ni tawhin Siaha District-ah chuan June 1, 2022 khan khap a ni tawh a ni.

Chief Minister Zoramthanga chuan nimin khan a Office Chamber-ah 36th National Games 2022 neih zawh taka Judo inelna a Gold Medal latu Lalhumhimi hnenah lawmpuina thuziak leh pawisafai Rs. 10,000/- a hlan a. Thla hmasa a Gujarat-a National Games vawi 36-na neih zawh takah khan Mizoram aiawhin Lalhumhimi hian Judo (52kg) huangah Gold Medal a la a. Mizoram atanga Judoka zinga Gold Medal la thei awmchhun a ni.

Department of Information and Public Relations leh Mizoram Art Development Society (MADS) tangkawp buatsaih ‘Mizoram Annual Art Exhibition 2022’ chu nimin khan Aizawl Art Gallery-ah FCS&CA Secretary Ramdinliani chu a hawng a, MADS Exhibition-ah hian Mizoram hmun hrang hrang atangin lemziak thiam (artist) 65 ten an lemziak pakhat theuh an phochhuak a, tun thla ni 12 thleng a awh dawn a ni. MADS hnuaiah hian Member 86 an awm mek a, kumtin Associate member dilna hun hawngin, a titha zualte hnenah Member nihna pek thin an ni.

Rampum huapa Nurse hnathawk tha te chawimawina, Florence Nightingale Award, 2021 chu nimin khan Thingsulthliah PHC-a Staff Nurse hna thawk mek Vanlalrovi hnenah President, Droupadi Murmu chuan Rashtrapati Bhavan ah a hlan a. He chawimawina a dawnna ah hian Vanlarovi chu kum 28 lai Nurse hna a thawh mekah theihtawp chhuaha a hun hlu tak senga midang tana a inpekna te, a bikin nau chhar leh rikrum thila chetsualna tawk a tanpui dan leh mahni nunna lak tum a chhan tawh thu te tarlan a ni.

Sports Minister Robert Romawia Royte chuan Inrinni khan Kawnpui Field No. 2 chu a hmunah tlawhin Kawnpui Field No. 2 chu a Area a tet deuh avangin a theih chinah tihlen a nih tur thu leh, Phullem phahin Phullem tha chi FIFA approved quality hman a ni ang tih a sawi a. MSSC hotute chuan SASCI Scheme atanga sak tur a nih thu leh cheng nuai 600 sanction a nih thu an sawi bawk. Hemi hnu hian Khamrang khua pawh Minister hian tlawhin, Khamrang khua hi Eco Tourism Project hmun pawimawha siam tumin Mizoram sawrkar Tourism Department DPRs a siam thu leh tunhnaiah cheng nuai 800 sanction a hmuh thu a sawi bawk.

Nimin tlai thleng khan Mizoram-ah COVID-19 hri kai enkawllai mi 54 an la awm.

ZPM Party chuan ZNP dinthar leh tute chu nimin khan an Party ah lawmlut niin an sawi.

Sports Department changtu Minister Robert Romawia Royte chuan PMJVK-ah Department tinin Project an siam thei vek tih sawiin, “Sports atanga kan hui luh tam avangin CM duhsak bik tihna a ni lo,” a ti.

Hachhek bialtu MLA Lalrindika Ralte chuan a bial chhung leh Mizoram khawthlang lama Kuhva chingtuten Kuhva rah hralhna kawnga harsatna nasa tak an tawh chungchangah hma la turin nimin khan Prime Minister hnenah Memorandum a thehlut.

Nimin khan Chief Minister Zoramthanga hovin Mizoram chhunga National Highway a hnathawh mek dinhmun leh harsatna awmte sawihona neih a ni.

Paithar Group Young Lai Association (YLA) leh Paithar tlang dung VC Association te chuan October 14, 2022-a Electric Current man vanga Rulkual khaw mi pathum thihna leh midang pahnih hliam an tawrh chungchangah nimin khan Power & Electricity Lawngtlai Division leh Lawngtlai SP Office te hmuin vanduaina thlen chhan kimchang taka chhui chhuah a nih theih nan FIR thehluh that leh nise an ti.

Thla thar December 1, 2022 atangin Aizawl Municipal Corporation (AMC) Area huamchhung leh District khawpui zawng zawnga LPG Consumer te In-ah eirawngbawlna Gas dahsak/pek (LPG Home Delivery) tan tura tih a ni.

Agriculture Department in SEDP hnuaia OP-12 Bio-Fertilizer Production Unit an buatsaih chu nimin zing khan Chief Minister Zoramthanga chuan hawngin, he Bio-Fertilizer siamchhuah hmang hian Agriculture leh Horticulture kalphungah nasa taka danglamna siamin hma a sawn phah a beisei thu a sawi.

Thla hmasa Oct. 29, 2022 tlai-a Tuirial Airfield peng bula Petrol phurtu Tank Lorry chesual a kan zui avanga thi chu nimin tlai thleng khan mi 8 an tling ta a, he vanduaina thlen zan khan mi 4 thi nghalin damdawi In a enkawl zinga mi pahnih Tuitial leh Tuirial Airfield Venga mi te chu tun thla ni 2 khan an boral leh a, Nov. 3 khan Lalrinchhana (23), Sihphir chu a boral ve leh bakah nimin khan Lalawmpuia, Thingsul Tlangnuam pawh a hliam tuar lovin a boral ve leh bawk a ni.

Mizoram Pradesh Congress Committee (MPCC) President Lalsawta chuan Serchhip bial hmasawnna thlen tur leh Lal Thanhawla hnathawh chhunzawm turin MNF Headquarter-a Secretary Vanlaltluanga an sawm thu sawiin, “Amah kaltlangin he bial hmasawnna hna hi Congress Party in a thawk zel dawn a ni,” a ti.