Serchhip bial-ah Vanlaltluanga kaltlangin hmasawnna hna Congress Party in a thawk zel dawn - Lalsawta

Mizoram Pradesh Congress Committee (MPCC) President Lalsawta chuan Serchhip bial hmasawnna thlen tur leh Lal Thanhawla hnathawh chhunzawm turin MNF Headquarter-a Secretary Vanlaltluanga an sawm thu sawiin, “Amah kaltlangin he bial hmasawnna hna hi Congress Party in a thawk zel dawn a ni,” a ti.

MPCC Campaign Committee ruahman angin Inrinni chawhnu khan Serchhip Bazar-ah Serchhip leh Serchhip West Block Congress Committee-ten Joint Block Conference leh mi thar lawmluhna hun hmangin he hunah hian MPCC President Lalsawta chuan MNF Headquarter-a Secretary R. Vanlaltluanga leh mithar 171 te chu an Party ah a lawmlut a. He hunah hian Lalsawta chuan Serchhip bial-in MLA-ah tum nga Lal Thanhawla an thlan avangin Remna leh muanna, Hel awm lohna ramte Mizoram in kan neih phah tih sawiin, “Kan ram rohlu leh hmasawnna tam tak min siam saktu leh remna leh muanna thlen nana in pe, Dr. Lal Thanhawla hnathawk thei siamtu Bial in ni,” a ti a. “Vawiin-ah Serchhip bial hmasawnna thlen tur leh Pu Lal Thanhawla hnathawh chhunzawm turin Pu Vanlaltluanga kan sawm a, amah kaltlangin he Bial hmasawnna hna hi Congress party in a thawk zel dawn a ni,” a ti bawk.


MPCC President Lalsawta chuan, nakum-ah kan inthlang dawn tih pawh sawiin, Party te inralrin dan leh inpuahchah dan a in ang lo dawn khawp mai niin a sawi a. “Sum hmanga sawrkar tum ten an zia an chhuah dawn. Inthlana sum chakna hi kan thah loh chuan ram rorelnaa sum hman dik lohna hi a nung reng ang. Vote tura lei theih kan nih chuan Sal leh Nawhchizuar ang lek kan ni ang. Dik lohna ata kan ram chhan tur hian kum khat chhung lek sum hmanga thlemna laka kan inthiarfihlim a ngai a ni,” a ti bawk.

He hunah hian lawmluh thar te atangin R. Vanlaltluanga pawhin thu sawiin, midang tana malsawmna nih tuma kum 20 chuang lo buaipui tawh a nih thu leh sum leh pai-a hlawkna um a Congress zawm a nih loh thu a sawi bawk.

Serchhip leh Serchhip West Block Congress Committee Joint Block Conference hi SBCC President Lalramnghaka Kawlni chuan kaihruaiin MPCC Vice President Lal Thanzara leh Treasurer Zodintluanga bakah MPCC General Secretary PC. Laltlansanga te pawhin thu an sawi a, he huna tel hian Resolution pathum an pass bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man