CM hovin Mizoram NH-a hnathawh dinhmun thlirho

Nimin khan Chief Minister Zoramthanga hovin Mizoram chhunga National Highway a hnathawh mek dinhmun leh harsatna awmte sawihona neih a ni.

CM Office Conference Hall-a he sawihona hunah hian Mizoram hmun hrang hranga NHIDCL hnathawh dinhmun leh harsatnate thlirho niin Vairengte - Sairang kawng (NH-306 & 6) te, Lunglei - Tlabung (NH-302), Seling - Dulte (NH-6), Chhiahtlang leh Serchhip bypass (NH-53) te, Keifang - Tuivai (NH-102B) leh Tuipang (NH-54)-a Forest Clearance chungchang te bakah Utility Shifting chungchanga P&E Department nena an indawr mekna te enho a ni a. Heng harsatna hrang hrangte hi Working Season laia a tam thei ang ber thawh a nih theih nan a tul anga sawrkar laipuia hotute hnena thlen ngaite chu thlen ni se an ti bawk. Heng bakah hian bypass road siam belh tur, sawrkar laipuia la nawr ngaite sawiho a ni bawk. Nimin a hemi chungchang sawihona ah hian Land Revenue & Settlement Minister Lalruatkima leh Adviser to Chief Minister te bakah sawrkar Department hotute an tel a ni.