December ni 1, 2022 atangin AMC Area leh District Hqrs. ah LPG Home Delivery kalpui dawn

Thla thar December 1, 2022 atangin Aizawl Municipal Corporation (AMC) Area huamchhung leh District khawpui zawng zawnga LPG Consumer te In-ah eirawngbawlna Gas dahsak/pek (LPG Home Delivery) tan tura tih a ni.

Hemi chungchang hi Secretary, Food, Civil Supplies & Consumer Affairs Department-in tun thla ni 1-a thuchhuah a siam ah hemi chungchang hi tarlan a ni a, LPG Home Delivery hi a enchhin nan (pilot basis) Aizawl Municipal Corporation Area huamchhunga Veng 4-ah May ni 5, 2019 atangin kalpui tan a ni a. Tunah hian Veng 29-ah kalpui mek niin he ruahmanna hlawhtling taka kalpui a nih thei nan inrawnkhawmna leh sawihona tum engemaw zat IOCL hotute, LPG Distributor-te, Local Council hruaitute, NGO aiawhte bakah Consumer aiawh ten an nei tawh a. May, 2022-ah pawh khan hemi chungchanga inhrilhhriatna heng Veng-ah te hian IOCL leh Mizoram Consumers’ Union te nen tangho in Directorate of Food Civil Supplies & Consumer Affairs chuan an kalpui bawk a ni.

LPG Home Delivery chungchangah Ministry of Petroluem & Natural Gas in Liquified Petroleum Gas (Regulation of Supply & Distribution) Order 2000 dated 26.04.2000 a chhuah bung 9(e) in a sawi angin a mawhphurtu Sawrkar enkawl Oil Company phalna la hmasa lovin Distributor tumahin an hnena Consumer inziaklutte hnenah Home Delivery a ti lo thiang lova, mahse hemi atan hian State Sawrkarin, an ram leilung awm dan leh distributor te kalkualna tur ngaihtuah chungin, Home Delivery atana consumer ten pawisa an chawibelh tur a tuk thei a. Hemi zulzui hian Mizoram Sawrkar chuan distributor ten Home Delivery atan consumer te hnen atangin Rs. 70 an lak belh thei ang tiin a ruahman a ni.

Hemi hmalam hian LPG Home Delivery chu a tha nia sawiin FCS&CA thawk te chuan, “Tuna Home Delivery kalpui tawh Veng hi inchhir an la awm lova, a hmaa Point Delivery anga kalpui leh hi an duh tawh lo a ni,” an lo ti tawh a. Tuna Home Delivery man bur khat zelah Rs. 70 chu Aizawl Veng zawng zawngah kalpui anih hun chuan tun ai hian a hniam zawk dawn niin an lo sawi tawh bawk a ni.

Comments

Popular News (Last 30 Days)

LPG man bithliah thar