ZPM-ah ZNP dinthar lehtute lawmluh an ni

ZPM Party chuan ZNP dinthar leh tute chu nimin khan an Party ah lawmlut niin an sawi.

Nimin a thuchhuah an siamah ZPM Party chuan nimin-a Chhung Inkhawm an neih ah ZPM Working President K. Sapdanga chuan ZNP dinthar leh tute leh mi thar dang, an zavaiin mi 130 ZPM-ah a lawmlut tih an tarlang a, K. Sapdanga chuan, “Tunhnaiah chhan hrang hrang avangin hmun hrang hrang atangin an lo hawkhawm zel a, mi mangangte tlankhawmna nih hi a lawmawm viau rualin, Inpui nghaktute pawh thlamuanpui tham tura kan awm a tul,” a ti a ni.

He hunah hian ZPM Leader Lalduhoma pawhin ZNP dinthar lehtu, engemaw avanga la khaw tang rih te pawh lo haw turin an sawm tih sawiin, “ZPM hi kan thang zel a, kan eng in a chhun phak chin pawh a zau ta a, chutihrualin min hualtu thim pawh a zau ve zel a, heng hi kan paltlang a ngai. Min beitute beihlet hi a tul ber lo, Pathian i ngaichang ang u. Sawrkarna chang turin kan thawhrim a ngai a, kan tan tak tak a ngai, Party dang zawng zawng aia kan thawhrim a ngai. Hei hi Hqrs. atanga Unit thlengin i hria ang u, Pathian malsawmna dawng tlakin kan zavaiin rim takin i thawk ang u. Mi aia kan thawhrim chuan Pathian in mal a sawm ang a, kan sawrkar ngei ang tih hi ka ring tlat a ni,” a ti bawk.