Lengte ram kaltlang NH. 54 helna zawh theih tawh

Serchhip Sailiamkawn atanga NH. 54 hel-a Dawngzawl kalna kawng chu lirthei zawh theih tura peihfel a ni ta.
Hemi chungchangah SDO (Sadar) Serchhip in thuchhuah siama a tarlan danin Sailiamkawn atanga Keitum inkara NH-54 kawng siam mek pumpelh kawng, Sailiam-kawn atanga Dawngzawl hi peihfel ni tawhin Serchhip leh Keitum inkar kal tur Two Wheeler leh LMV-te tan he kawng hi a hman theih tawh thu a tarlang a ni.

Lengte ram kaltlanga he kawng hi tunhma lam pawhin lirthei kal theiha siam ni tawhin Hriangtlang kawng chhiat lai khan kalna ber atan hman a ni a, amaherawh chu a kawng a chhiat avang leh a tet avangin lirthei tan zawh a harsa thin a, KRAM Infracon Pvt. Ltd. chuan khawl hmanga siamthain tunah chuan lirthei zawh theih tura peihfel a ni tawh a, he kawng hman theih a nih hnuah hi chuan NH. 54 siamthat hna pawh chak zawka thawh theih tura ngaih a ni.