SEDP hnuaia Agriculture Department buatsaih OP-12 Bio-Fertilizer Production Unit hawn a ni

Agriculture Department in SEDP hnuaia OP-12 Bio-Fertilizer Production Unit an buatsaih chu nimin zing khan Chief Minister Zoramthanga chuan hawngin, he Bio-Fertilizer siamchhuah hmang hian Agriculture leh Horticulture kalphungah nasa taka danglamna siamin hma a sawn phah a beisei thu a sawi.

Agriculture Research Farm, Neihbawi, Sihphir-a OP-12 Bio-fertilizer Production Unit hawnna hunah hian Chief Minister chuan kuthnathawktu te tana hlawkna nasa tak thlen thei tur OP-12 Biofertilizer Production Unit hawn theih tura peihfel a ni chu lawmawm a tih thu sawiin, he Biofertilizer siamchhuah hmang hian Agriculture leh Horticulture kalphungah nasa taka danglamna siamin hma a sawn phah ngei a beisei thu a sawi a. Leilung ngheng-a eizawnna, a bik takin Agriculture leh Horticulture kan tih te hmanga sang taka economy khaikan theihna Potential Mizoramin a neih that zia sawiin, chung zinga pawimawh tak pakhat chu leitha a ni, a ti a. Hetianga mahni ram ngeia fertilizer tha leh him siamchhuah a ni chu ropui a tih thu sawiin, tharchhuah tam kawngah pawh thui tak a pui ngei a beisei thu a sawi a, productivity a tam chuan a lei duhtu pawh a awm zel thu leh a kawng erawh dapchhuah thiam a pawimawh thu a sawi a. Heng hmalakna ah hian Cooperative Society pawimawhna tarlang tel bawkin, hmasawn zel duh avanga hmathlir tha tak nen a kuthnathawktu an intelkhawm chuan pawl pawh a ngelnghet in hlawhtlin a awl zawk thu a sawi bawk.

Khualzahawm Agriculture Minister C. Lalrinsanga chuan kuthnathawktu te tana bung thar thlen thei tu hun an hmang thei chu lawmawm a tih thu sawiin, Agriculture Department hmalakna hrang hrang a tarlang a. Lengpui-a Bio-Control Laboratory, RIDF, NABARD hnuai a din mek te, NEC hnuaia ‘Aeroponic Technology’ hmanga Alu chi siamna tur Project Thingdawl Agriculture Farm a hmalakna kalpui mek te a tarlang bawk.

He hunah hian Agriculture Department Deputy Director Dr. Samuel Lalliansanga chuan Technical Report pein he Project hi Mizorama Loneitu ten hlawk zawka an thlai chinte Chemical fertilizer tel lova an tharchhuah theihna tura hmalakna pawimawh tak a nih thu a sawi a. He Project hi kum 3 chhunga SEDP hnuaia kalpui turin kum 2019-ah approved niin cheng nuai 125.31 ruahman a ni.

He Project hnuaiah hian Research Institute leh University - Biotechnology Department, Mizoram University leh CSIR – North East Institute of Science & Technology, Jorhat te nen Agriculture Department chu thawkho in kum 2019 atanga bultan a ni a. Biofertilizer Production Unit siamna tur atana Technology hi CSIR-North East Institute of Science & Technology, Jorhat Patented Technology niin hemi atan hian Agriculture Department leh CSIR-NEIST, Jorhat te chuan 2020 khan MoU, Turn Key Project a kalpui turin an lo siam fel tawh a ni.

He Bio-Fertilizer Production Unit atanga siamchhuah Bio-Fertilizer ah hian Micro-Organism kengtu (carrier) atan Talc Powder hman a ni a, thla 6 chhung a dah that theih a. Buh leh thlai chi hrang hrangah a chi chiah nan (Seed Treatment) leh leilung sawngbawl (Soil Application) atan a hman theih a ni a. Helai-a Bio-Fertilizer siamna hmun atang hian Batch khatah Biofertlizer quintal 18 a siam chhuah theih a ni.

He Project hnuaiah hian Mizoram University te hian hmun hrang hrang atangin Soil sample te lakhawmin kan Leilung a hrik tangkai (Plant Growth Promoting Bacteria) hrang hrang te zirchianna an nei mek bawk a ni.