CM duhsak bik nia sawi thin sawifiah

Sports Department changtu Minister Robert Romawia Royte chuan PMJVK-ah Department tinin Project an siam thei vek tih sawiin, “Sports atanga kan hui luh tam avangin CM duhsak bik tihna a ni lo,” a ti.

Nimin-a MNF Party in Aizawl-a Mizo Hnam Run inkhawm an neih ah MNF Adviser leh Sports Department changtu Minister Robert Romawia Royte chuan Chief Minister-in a duhsak bik nia an sawi thin chungchang a sawifiah a, “Kan Chief Minister zahawm tak hian Minister leh MLA-te a duhsak dan a inang vek. Duhsak bik tia sawi thin hi - Pu Robert-a hi eng Department nge a pek? Finance Department atangin pawisa engzat nge a pek? NABARD loan a pe em? NEC leh Doner Ministry hnuaia Priority List-ah Project engzat nge dahsak a nih? tihte hi in lo chhut dawn nia,” a ti a. Covid-19 hnu lama PMJVK inti hria (party dang) an awm te chu a awih loh thu sawiin, “Department tinin project an siam thei vek. Sports atanga kan hui luh tam avangin Chief Minister duhsak bik tihna a ni lo,” a ti bawk.

SEDP chungchang pawh sawiin Robert Romawia chuan, “Mi hausa tan a tangkai lo mai thei. Mi rethei leh harsa zawk tan chuan Direct Benefit Scheme tha tak a ni a. Dik takin kalpui ila, Party danga mi harsate pawh i thlang zel ang u,” a ti bawk.