Lenkawl

MP (RS) in IR Duty a tlawh

Niminpiah-a Mizoram-a Sample enfiah atangin COVID-19 hri kai hmuhchhuah belh an awm lova, Mizoram-a hri kai hmuhchhuah tawh zawng zawng chu 4413 an ni.

Nimin Assembly session-ah Bill pahnih te chu lungrual taka pawm a ni. Nimin-a Assembly inkhawm ah hian Higher & Technical Education Minister, Dr. R. Lalthangliana chuan 'The Mizoram State Higher Education Council (Amendment) Bill, 2021' pulutin AH&Vety Minister, Dr. K. Beichhua chuan 'The Mizoram Licensing and Regulation of Private Veterinary Hospitals and Clinics Bill, 2021' a pulut thung a. Heng Bill pahnihte hi Member-ten an sawiho hnuah pawm ve ve a ni. Nimin-a Assembly Session-ah hian Paper pasarih pharh (lay) a nih bakah, Report pathum pharh (present) a ni bawk.

Higher & Technical Education Minister, Dr. R. Lalthangliana chuan Tuirial-ah College din tumna a awm loh thu House hrilhin, Chief Minister, Zoramthanga pawhin kum 2018-a inthlanpui dawnah Tuirial-ah College din an tum thu a sawi lo tih a sawi.

Mizoram chhungah damdawi zawrh phalna nei mi 3583 an awm a, COVID-19 Sample Test hmangin sawrkarin Rs. 3,42,94,900/- a hmuchhuak tawh.

LAD Minister K. Lalrinliana chuan Mizoram Village Council inthlan neih hnuhnung berah thil fello awm nia hriatna State Election Commission-ah Complaint thehlut mi 242 an awm thu ziakin House a hrilh a. Inthlan buaipuitu Official te hrem an awm loh thu a sawi bawk.

Taxation Minister, Lalchamliana chuan Myanmar atanga Kuhva lakluh chu ramdang atanga lakluh a nih avangin Dan phalloh a nih thu a sawi a, khawchhak atanga Mizoram kaltlanga Kuhva lakluh Assam lama lut thla tur dang turin sawrkar a in buatsaih tih a sawi bawk.

Serchhip District Magistrate chuan thupek siamin Mizoram Sawrkar thuchhuak in a tarlan ang leh Serchhip District mipuite COVID-19 hrileng laka an him theihna turin Section 144 of Cr.PC 1973-in thuneihna a pek angin District Hqrs. chhungah zan dar 10:00 leh zing dar 4:00 inkar ah pawn chhuah khap tlat a nih thu a tarlang a, hei bakah hian District Hqrs. a Dawr, Hotel, Restaurant leh sumdawnna hmun dangte chu zan curfew tan hun bawhbuai lova khar tur a ni. He thupek hi hman nghal tura tih niin hei hian phalna pek bik te a huam lovang.

Nikum November 19-a India rama District 20 thlanchhuah te hnena World Toilet Day Award sem chu hri leng avanga Video Conference hmanga sem a nih hnuah Serchhip District in he Award a dawn in a kentel hrang hrangte chu nimin khan Serchhip DC, Kumar Abhishek IAS chuan PHE Serchhip WATSAN Division-a Sr. Executive Engineer, Er. F. Lalsanglura hnenah a hlan a, PHE Department hnuaia Swachh Bharat Mission (G) kalpui ah Serchhip District hian All India Level Award vawi 2 an dawng tawh a ni.

Nimin khan Serchhip District-ah Rapid Antigen Test hmangin Sample 4 enfiah leh niin heng atang hian COVID-19 hri kai hmuh belh an awm lo a ni.