Myanmar atanga Kuhva lakluh chu ramdang atanga lakluh a nih avangin Dan phalloh a ni

Taxation Minister, Lalchamliana chuan Myanmar atanga Kuhva lakluh chu ramdang atanga lakluh a nih avangin Dan phalloh a nih thu a sawi a, khawchhak atanga Mizoram kaltlanga Kuhva lakluh Assam lama lut thla tur dang turin sawrkar a in buatsaih tih a sawi bawk.

Nimin a Mizoram Legislative Assembly thutkhawm-a zawhna leh chhanna hunah Congress Member leh Thorang bialtu MLA, Zodintluanga zawhna chhanga Kuhva lakluh changchang hi sawiin Taxation Minister chuan sawrkar laipui nawrna avangin kuhva lakluh tihtawp tuma hmalak a nih thu a sawi a, Myanmar atanga Kuhva phurluh titawp turin India sawrkar-in Mizoram sawrkar lehkha a thawn thu leh Myanmar atanga kuhva lak luh te Silchar lama luh thlak tir tawh lo tura sawrkar hmalak dan te House-ah a sawi chhuak bawk a ni.

Taxation Minister chuan, nikum November thla bawr vel khan Kuhva-a sumdawng pawl pathum ten amah leh hotu dangte hmuin an Kuhva tangkhangte chu chhuah turin an ngen tih a sawi a, khawchhak atanga Kuhva lo lut tawh sa te thenfaina tur leh Kuhva-a sumdawng ten vaibelchhe tel sum an sen avanga khawngaihna nen Dan hrulah GST lak sakin Kuhva tangkhang te chu an chhuahtir thu a sawi a, hei hi sumdawng ten remchangah hmangin tunhnai thlengin Myanmar atangin kuhva a lo la lut reng tih leh chumi titawp tur chuan hma an la chho ta tih a sawi a ni. Taxation Minister Lalchamliana chuan, Kuhva atanga GST lak a nih hnuah Chhiah lak chu a pung nasa hle tih sawiin, Kuhva atanga Chhiah lak a nih hmaa sawrkar kum khata cheng nuai 18 atanga cheng nuai 20 te hmuh a nih laiin Kuhva atanga GST lak a nih hnuah erawh cheng nuai 90 te a tling chho tih a sawi a ni.

Taxation Minister chuan Kuhva atanga GST an lak dan chungchang pawh sawi telin, Kuhva bag chu chi khat chauh a awm loh avangin a bag ang zawnga rate chu sawi theih a ni lo tih a sawi a, tunah hi chuan Kg. 1-ah Rs. 40-a hralh angin sumdawngte hian Kuhva rah ro-ah hian Chhiah an pek thu leh GST rate chu zaa 5 a nih thu a sawi bawk a. Assam Rifles ten kawnglak a an duh duhna hmuna Check Post an siam thin nia sawi chungchangah Mizoram sawrkar leh Assam Rifles thuneitute chu hemi chungchangah hian an intauh fo niin a sawi a, MAMCO in Certificate lem an pek leh pek loh zawhna chu an hriatpui loh thu a sawi bawk.