Latest News

Chanchin thar thenkhat :

MP (RS) in IR Duty a tlawh

Mizoram Rajya Sabha MP, K. Vanlalvena chuan nimin khan Mamit District chhung Thing-hlun dai-a IR duty-te tlawhin, John Zolawma Thlam, Assam lamin an halsakna hmun Mizoram IR-in an luah takte a tlawh bawk a, harsatna an neihte a hmunah a enfiah nghal a. Ramri daia BSF te duty-na hmun pawh a tlawh nghal bawk. Heng hmun a tlawhna ah hian Rajya Sabha MP chuan Assam lamin kan ram an tih china Mizo-ram Sawrkarin Police post siama kan thutchilh nghal thei chu lawmawm a tih thu a sawi bawk. Rajya Sabha MP hi Kawrthah SDPO, Lalthanfala Sailo chuan a lo dawngsawng a ni.


Bank te hmalakna thlirlet

Nimin khan Lunglei leh Champhai-ah District Consultative Committee/District Level Review Committee/District Level Security Committee chu thukhawmin nikum Quarter hnuhnung bera an District chhunga Bank hrang hrangte hna-thawh dan an thlirlet a, he hunah hian Bank in venhimna a neih dan hrang hrang bakah sum leh pai an dawn leh loan an pekchhuah dan te chipchiar taka thlirlet a ni. Lunglei District huam-chhungah hian Bank 20 an awm mek a, Cham-phai District-ah hian Bank Branch 17 a awm bawk a ni.


MHA Jubilee lawmna nei tan

Mizo History Association (MHA) Annual Conference-cum-Seminar leh Ruby Jubilee lawmna chu nimin khan neih tan niin ni 2 chhung a awh ang. Mizo History Association hi Sept. 23, 1980 khan Prof. Darchhawna, Prof. JV. Hluna leh Dr. Lalrimawia te ho-a din niin, kum 40 a din chhung hian kumtin Annual Conference-cum-Seminar nei thinin, ‘Historical Journal Mizoram’ pawh kumtin an tichhuak thin a ni. Nimin-a tan Annual Conference lawmna ni Art & Culture Director, R. Hmingthanzuala chuan hmanpuiin Ruby Jubilee puala Essay inziahsiakna lawmman sem a nih bakah Souvenir leh Journal te tlang-zarh a ni bawk.


PMMVY hnuaia National Award dawn lawmna nei

Prime Minister's Flagship programme hnuaia raipuar leh nau neite tanpuina, Pradhan Mantri Matru Vandana Yojana (PMMVY) hnuaia East Lungdar ICDS Project in National Best Performance Award & Best Implementation Award an dawn lawmna chu nimin khan East Lungdar-a BRC Hall-ah neih a ni a, he hunah hin East Lungdar BDO, H. Lalhruaitluanga chu khuallian niin East Lungdar ICDS Project in National Award an dawng thei chu chhuanawm a tih thu a sawi a, Award an dawn chu anmahni fuih chaktu ni a hmasawn zel turin a fuih bawk a ni.

He hunah hian PMMVY-a State Nodal Officer leh Social Welfare Department Deputy Director, Zoramthangi Chhangte leh East Lung-dar-a sawrkar hnathawkte leh NGO hruaitute an tel a, PMMVY State Nodal Officer chuan tehfung chi hrang hrangah Anganwadi Worker te, ICDS Staff leh PMMVY Staff ten theihtawp an chhuah avangin he Award hi an dawng theih tih a sawi a, Award dang pawh la zel thei tura tang turin a fuih bawk.


District hrang hranga Children Science Congress nei

District Level Children Science Congress chu tunkar chhung khan District hrang hrangah neih niin nimin khan Aizawl District bakah Kolasib, Saitual leh Khawzawl District ten an nei a, nimin-piah khan Serchhip District-in an neih bakah Vawiin hian Champhai, Lunglei leh Lawngtlai District-in an nei ve leh dawn a ni. District hrang hrang atanga Child Scientist thlanchhuahte chuan March 3 leh 4, 2021 khian State Level Children Science Congress neih leh a ni ang. Children Science Congress hi Central-ah kum 1993 atangin kumtin neih thin a ni a, Mizoram ah pawh Science Teachers Association Mizo-ram (STAM) buatsaihin kumtin neih thin a ni.

Comments

Chhiar Hlawhte