Latest News

Damdawi zawrh phalna nei mi 3583 awm mek

Mizoram chhungah damdawi zawrh phalna nei mi 3583 an awm a, COVID-19 Sample Test hmangin sawrkarin Rs. 3,42,94,900/- a hmuchhuak tawh.

Mizoram Legislative Assembly thutkhawm-a zawhna leh chhanna hunah eptu Member, VL. Zaithanzama zawhna chhanga he thu hi sawiin Health Minister, Dr. R. Lalthangliana chuan Mizoram-ah Drugs License nei mi 3583 an awm thu a sawi a. Aizawl District-ah 1821 awmin, Lunglei District-ah 467, Champhai District-ah 271, Kolasib District-ah 226, Lawngtlai District-ah 232, Serchhip District-ah 146, Siaha District-ah 121, Mamit District-ah 267 leh Mobile-a damdawi zawrh phalna nei 32 an awm thu a sawi bawk a ni.

Health Minister chuan Mizoram sawrkarin COVID-19 sample endikna atangin Rs. 3,42,94,900 a hmuhchhuah tawh thu Assembly House hi ziakin a hrilh bawk a, COVID-19 Sample endikna RT-PCR hmangin mi 99,841 endik ni tawhin, hemi atang hian Rs. 2,17,09,500/- hmuhchhuah a ni tawh a. TrueNAT Laboratory hmangin mi 19678 test tawh niin Rs. 82,69,600/- hmuhchhuah a ni tawh bawk a. Rapid Antigen Test hmangin mi 93,155 test an ni tawh a, hemi atang hian Rs. 43,15,800/- hmuhchhuah tawh a ni bawk a ni.

COVID-19 hrilen hnuah ICU a hman tur Khum 15 chu Indian Oil Corporation Ltd. (IOCL) in an pek thu leh Mizoram chhungah ICU khum 41 a awm tih Health Minister chuan a tarlang bawk a. ICU khum awmna hmun hi Aizawl Civil Hospital-ah 5, State Referral Fal-kawn-ah 14 leh Make Shift-ah 22 dah a nih thu a sawi a, ICU Khum hi District Hospital 7-ah dah belh tum mek a nih thu pawh tarlangin, Aizawl, Kolasib, Lunglei, Champhai leh Serchhip tan ICU Khum 5 theuh chu TRAUMA Centre tihchangtlun nan lei a nih thu a sawi a. Civil Hospital ICU tih changtlun nan ICU Khum 22 lei a ni tawh tih a tarlang bawk. Health Minister chuan Mizoram-ah COVID-19 hri kai te enkawlna hmun, Covid care Centre (CCC) 33 a awm thu a sawi bawk.

Comments

Chhiar Hlawhte