Lenkawl

MNF Party chuan nimin khan Aizawl-ah Mizo Hnam Run Chhung Inkhawm neiin he huna thu sawitu P&E Minister R. Lalzirliana chuan an Department hmalakna tarlangin, Aizawl khawpui chhunga Electric hrui inzam nuai chu felfai taka ABC line-a thlak thuai anih tur thu leh Power-ah kan hnianghnar zawk theih nan DPR hrang hrang an siam mek thu te a sawi bawk.

I&PR Minister Lalruatkima chuan nimin khan Aizawl Art Gallery, Khatla-ah Tanpuia 10th Solo Painting Exhibition chu khuallian niin a hmanpui a, he Painting Exhibition-ah hian Laltanpuia lemziah 46-phochhuah niin March 22, 2023 thleng a awh dawn a ni.

Tunhnaia Champhai District chhunga dan zawm lova lo/huan hala ram tikangtu ni a puhte lakah Champhai District Level Fire Prevention Committee aiawhin Member Secretary leh Cham-phai DFO Lalduhthlana chuan nimin khan Champhai Police Station-ah FIR a thehlut a, FIR hi kangmei tichhuaktu a puh mi 6; Ngur khua 1, Kanan Veng 4 leh Tlangsam 1 te lakah thehluh a ni a. Heng mite hian Lo/huan an hal dawnah VC an hriattir hmasak loh vang te, Meilam tha tawk an sial loh avang te, kangmei chhuakin ram zau tak tichhiain thing engemawzat a kanral bakah khawtlang ti ralti-a a bul vel a In te tana hlauhthawnawm a thlen avangte in FIR hi theh-luh a ni hlawm a ni.

Chief Minister Zoramthanga chuan nimin khan Aizawl Khatla South YMA Branch Silver Jubilee lawmna Khatla South YMA Hall-a neih chu khuallian niin a hmanpui a, Mizo khawtlang nunah YMA in hna tangkai tak tak an lo thawh tawh thin thu leh khawtlang nun siamthatna atana an pawimawhna te sawiin, khawtlang nun inrelbawlnaa YMA leh tlawmngai pawl dangte, kum upa atanga naupang ber huam kim vek pawl hrang hrang hlawmkhawm tha tak tak kan nei hi kan vanneihna a nih thu leh chhiatni thatni a kan tangkaipui ber, kan tlansan loh atan tha a nih thu a sawi bawk. Nimin-a he hun hmanna ah hian bialtu MLA VL. Zaithanzama pawhin thu sawiin, kum 1998 atanga 2023 chhunga Branch OB lo ni tawhte hnenah chawimawina hlan a ni bawk.

Mizoram Presbyterian Church chuan tunlai hian Kohhran inkhawm tihtlem chungchangah zirchianna a kalpui mek a, he zirchianna hi Synod Research & Evaluation Wing-in an buaipui a ni.

Lunglei Municipal Council (LMC) inthlanna neih tura Nomination Paper thehluh zingah pakhat chu hnawl a ni.

Mizoram Chief Secretary Dr. Renu Sharma chuan MyGOV platform tha taka kalpui anih theihna turin Deparment hrang hrangte thawhpuina tha a ngen.

December 17, 2021 zinga Aizawl DC Office kang ta sak that dan tur chu Cabinet Meeting kutah dah a ni tawh a, hetihlai hian he DC Office kang chungchangah Fire & Emergency Services Duty-te information an dawn hun atangin an che chhuak tlai lova, an lakah action lak a ni lo.

Sawrkar laipui chuan COVID-19 avanga thla 18 chhung Dearness Allowance arrear tlingkhawm chu Central sawrkar hnathawkte leh pensioner-te pek tumna a nei lo.

PC Party Thalaite chuan MNF Thalai Vice President chu Press mite hmaa thu dik lo sawi ah an puh.

Governor Dr. Hari Babu Kambhampati chuan Rural Development Department hotulu te nimin khan Raj Bhavan-ah kawmin Ministry of Rural Development hnuaia thingtlang mi te hmasawnna atana hmalakna te an sawiho.

Kum 2021-22 chhunga nungcha leh ramngaw humhalhna lam hawi inzirtirna atana YMA Branch te hnena Forest Department-in sum a pek dan RTI Act hmanga Zonet zawhna kal zela YMA Branch te hnena sum pek leh chu cheng nuai 7 a tling tawh a. YMA hruaitute chuan, a tira an sum dawn loh pek leh an nih chungchangah Forest Department hotute thenkhat chuan an mimal account cheque hmangin sum hi a pe leh niin an sawi a, pawisa pawh an la chhuak nghal niin an sawi. Hetihlai hian Aizawl-a Tanhril Branch YMA chuan an sum dawn kim loh Rs. 10,000 hi Department lamin pek leh tum mah se, thil kal lai a nih avangin an dawng duh rih lo thung a ni.

Baptist Church of Mizoram (BCM)-a ro-relna sang, BCM Assembly vawi 127-na Lunglei Salem Veng BCM Biak In-a neih chu nizan khan a tiak ta a, nimin Pathianni chawhma Inkhawm ah Minister/Pastor atan mi 5 nemngheh an ni. Tun tuma BCM Assembly-ah hian hmun hrang hrang atangin Palai 1,396 an tel a ni.

Mizoram-a Dengue hri leng chuan kumin ah ziaawm lam panin January leh February thla chhung khan hri kai 110 hmuhchhuah a ni.

UPC (NEI) Aizawl East District hnuaia Inkhawmpui lian ber, District Conference vawi 29-na chu nimin Pathianni hmang khan North Vanlaiphai Bial-a Leilet Biak In-ah neih a ni a, kumin hian Thupui leh Speaker hran bik nei lovin Inkhawm apiangin Kohhran hruaitute hnen atangin Pathian thuchah ngaihthlak thin a ni.

Zirtawpni kalta zan atanga Darlawn khuaa neih Zoram Kohhran Hmeichhe Inkhawmpui lian vawi 50-na chu nizan khan a tiak ta a, he khawmpui-ah hian Palai inziaklut 10,077 awmin Inrinni khan Rorelna neih a ni a. Kum 2025-a Inkhawmpui chu Thenzawl-ah leh 2027 chu North Vanlaiphai-ah neih a ni ang.

Health Minister Dr. R. Lalthangliana chuan Zoram Medical College (ZMC) hnuaiah Health Ministry leh ICMR atangin Research project 10 vel kalpui mek a ni, a ti.

Mamit District in kum 25 a tlin lawmna chu Inrinni khan Mamit Chhim Veng YMA Hall-ah neih a ni.

Govt. Champhai College-a Geography Department chuan Mizoram chhunga Tlang sang 5 te chu tunhnai khan a san zawng an teh thar.

National Highway Infrastructure Development Corporation Limited (NHIDCL) hnuaia NH-6 siam mek chu Inrinni khan Khawzawl District Bawrhsap C.C. Lalchhuangkima chuan a hmunah tlawhin an hnathawh te a enfiah.