Inkhawm tihtlem chungchang zirchianna nei mek

Mizoram Presbyterian Church chuan tunlai hian Kohhran inkhawm tihtlem chungchangah zirchianna a kalpui mek a, he zirchianna hi Synod Research & Evaluation Wing-in an buaipui a ni.

Synod Research & Evaluation Wing hian questionaire ti chhuakin, “Heng zawhnate hi Synod Inkhawpui, 2021 thurel bawhzuia Kohhran inkhawm leh inkhawm dangte tihtlem chungchanga Kohhran member-te ngaihdan zirchiang tura hmalak a ni. He hmalakna hi tha taka tawiawma, heng zawhnate hi uluk tak, a dik thei ang ber leh kim taka chhang turin zawhna chhangtu zawng zawngte beisei kan ni,” an ti a ni.

Questionaire-ah hian chhangtu dinhmun ziahna tur a awm bakah, chhan tur zawhna 13 awmin, zawhna pakhatah chhanna tur pathum atanga paruk vel zel dah a ni a, duh ber tick mai theih tura siam a ni a. Thenkhat erawh duhthlan tur awm lova chhan tawp tura dah a ni thung.

Zawhna zingah hian ‘Kohhran Inkhawm hi a tam ka ti,’ tih chu Pawm lutuk, pawm, pawm lo, pawm lo tawp leh ngaihdan nei lo tia chhan tih tura dah niin Kar khat-a an inkhawm thin zat te, Inkhawm zingah an ngaih pawimawh pathum te, Kohhran inkhawm bikah eng inkhawm nge an tlem ber tih te, Eng inkhawm nge paih rih pawi an tih loh te, Hun awl neih belh thei se eng atan nge an hman ang tih te, Kohhran hian inkhawm bak programme a siam tamin an hria em tih leh Kar khatah inkhawm engzat nge tihtlem an duh tih te an zawt a ni.