Governor Hari Babu Kambhampati hovin RD Department-a hmalakna thlirhona neih a ni

Governor Dr. Hari Babu Kambhampati chuan Rural Development Department hotulu te nimin khan Raj Bhavan-ah kawmin Ministry of Rural Development hnuaia thingtlang mi te hmasawnna atana hmalakna te an sawiho.

He hunah hian Governor chuan RD hnathawk te thawhrimna azarah ni za inhlawhna tluang taka kalpui a ni te, hnathawktute hming chhinchhiahna pawh National Mobile Monitoring System (NMMS) App hmang tangkaiin hnathawktu zawng zawng zinga 72% aia tam mah dahluh theih a ni chu lawmawm a tih thu a sawi a. MNREGA hnuaia ni za inhlawhna a thawk te Bank Account-ah hlawh tha takin, a hun takah thun theih char char a ni te chu thil lawmawm tak a nih thu a sawi a. Pradhan Mantri Awaas Yojana - Gramin (PMAY-G) hnuaia hmalakna chu Prime Minister Narendra Modi chuan a ngai pawimawh takzet tih sawiin, he hmalakna hnuaiah hian kum 2022 a ralhmain chenna In la nei lo ten chenna In an nei vek tura ngaih a nih laiin kum 2024 thlengin he hmalakna hi pawhsei a ni leh ta tih a sawi a. He huntiam pawhsei leh tak chhung ngei hian he hna ropui tak hi thawk zo thei turin RD chuan theihtawp a chhuah thu leh tan lehzual a ngaih thu a sawi a. Tunah hian PMAY-G hnuaiah MoRD atanga sum lut tur la lut lo a awm nual tih pawh sawiin, hei hi a chhan zawnchhuah ni se, a tul angin MoRD pawh amah ngeiin dawr a in huam thu a sawi bawk.

He hunah hian RD Department atangin Addl. Secretary Dr. Irene Zohlimpuii Chongthu, Joint Secretary Ethel Rothangpuii leh Deputy Secretary Zoremthara Ralte te telin PMAY-G leh NMMS hmalakna te a lem nen entira sawifiah a ni a. Tunah hian PMAY-G tanpuina hmanga Insak te chu a len zawng Sq.m 20 atangin Sq.m 25-ah tihlen a ni tawh a. Khua leh tui te dinhmun SECC-2011 hmanga zirchianna te khawtina Gram Sabha ten an endik hnuah PMAY-G tanpuina dawngtute hi thlan an ni thin a ni. He endikna hnuaia tel hman lo, Insak tanpuina mamawh si te chu Awaas+ (Additional Deserving Households) hmanga belh leh an ni bawk. PMAY-G hnuaia Insak tanpuina dawng tur hian chhungkaw 20,512 te ziahluh an ni.

National Mobile Monitoring System (NMMS) App hi tunhnaiah hman thar a ni a. He app hmang hian MNREGA hnuaia hnathawktute chhinchhiah a ni a, hnathawh leh a thlalak te pawh Satellite hmangin endik zung zung theih a ni bawk.