Khawzawl DC in NH-6 siam mek a hmunah a enfiah

National Highway Infrastructure Development Corporation Limited (NHIDCL) hnuaia NH-6 siam mek chu Inrinni khan Khawzawl District Bawrhsap C.C. Lalchhuangkima chuan a hmunah tlawhin an hnathawh te a enfiah.

Khawzawl District Bawrhsap chuan Anusha Projects Private Limited (APPL) Company ten NH-6 hnathawh mek chu beisei aiin a kaltluanga lawmawm a tih thu sawiin, Company-te chu leilung leh nungchate ngaihtuah reng chunga hnathawk thin tur leh, lui humhalh tlat turin a chah a. Bawrhsap chuan leivung an paih dante leh Tuisen lui tichhe lo tura hmalak dan turte APPL hotute sawipuiin, APPL lam hian an theih chinah Gabion Wall an siam thute, lui tui luang tichhe thei tur lung lian leh leivung luia lutte pawh an then fai mek thute an sawi a. DC rawtna angin remchang hmasa berah leivung an paihna hmunah te thing an phun tur thu an sawi bawk.

Hemi hnu hian NHIDCL hmalaknaa Puilo khaw dai-a View Point Tower sakna tur lungphum chu Bawrhsap hian a phum bawk a, Ministry of Tourism kaltlangin Assistance to Central Agencies for Tourism Infrastructure Development hnuaiah NHIDCL hian View Tower hi NE State 6-ah sakna tur a hmuh atangin Mizoram-ah pawh 9 sak a ni dawn a, tuna lung phum tak Tower hi NH-6 kawng siam mektu Dhariwal Builtech Limited (DBL) Company ten an thawk dawn a, View Tower hi Mizopa chhiarin chhawng 5-a sang tur niin Tower bakah hian Caretaker awmna turte, mipa leh hmeichhe in thiarna turte, Motor park-na turte a awm tel dawn bawk a. Tower san zawng hi lei atangin meter 17.4 niin NH-6 an siam zawh ruala hawn hman tura ruahman a ni a, sak zawh a nih hunah Tourism Department-in an enkawl zui dawn a ni.