Thu dik lo sawi ah puh

PC Party Thalaite chuan MNF Thalai Vice President chu Press mite hmaa thu dik lo sawi ah an puh.

Nimin-a thuchhuah an siamah PC Party Thalaite chuan March 11, 2023-a Aizawl Press Club-a MNF Thalai Vice President in thuthar thehdarhtute a kawm naa kum 2018 inthlana MNF Manifesto zinga thalai hmakhua lam hawi point 11 an siam te an tihpuitlin vek tawh thu a tarlan chu dawt leh thu belhchian dawl lo, mipuite bum tumna maiah an ngai tih an sawi a. MNF Party in thalaite puala 'Point 11 Manifesto' an siam te zînga point 3 vel emaw chauh tihloh, abàk zawng te erawh Vawiin thlenga an la tihhlawhtlin loh te a nih thu an tarlang.

PC Party Thalai thuchhuah chuan ‘Zirlaite Scholarship a nih dan tur taka pein, Zirna sâng zawk, Mizoram mamawh zir duh tan Student loan awlsam zawka siam a ni ang’ tih chu tih hlawhtlin tumna hmel hmuh tur a la awm lo nia tarlangin, ‘Zirna (Education) kalphung siamthat ngaite siamthat a ni ang a, Mizoram chhûng ngeiah khawvel ramdang el phak Zirna kawng hrang hrang din turin tan lak a ni ang’ tih pawh hmalakna hmel hmuh tur ala awm lo niin an tarlang a. ‘Zirna-In neihsa te tichangtlungin, Zirlaite leh Zirtirtute hamthatna hrang hrang siam belh a ni anga, Zirtirtu indaihlohna pawh siamrem a ni ang’ tih chu hmalak tak takna hmuh tur a la awm lo niin an tarlang.

Heng bakah hian Medical, Paramedical, Engineering, Technology leh Management zirna changtlung zawk kan neih theih nan hmalak a ni ang tih te, Man Power Development lamah hmalak a ni ang tih te, Zirlai, a mamawhtute tan District Hqrs. leh hmun remchang dang-ah Hostel siam a ni ang tih te pawh a hlawhtlinna hmel hmuh tur ala awm lo niin an tarlang bawk.