SUBJECT HAR - PM POSHAN (MID DAY MEAL)

SUBJECT HAR - PM POSHAN (MID DAY MEAL)

- Jacinta Vanlalengzami

Headmaster, A&M Granchild School

North Vanlaiphai

Thil tha tak pawh hi a hman dân a dik loh chuan a tha zîktluak thin lo a, buaina leh rilru hahna thlentu mai a ni thei. India rama naupangte hmakhua ngaiin sawrkar laipui remruatna hnuaiah, kum tam tak kal ta atang khan chhungkaw rethei zawk leh Slum area-a naupangte pawhin a zâr an zo theih nân, State tinah ni tina naupangten School-a chhun chaw an ei theih nân, a huam theih chin School-te hnenah buhfai leh chawhmeh, bawlhlo leh a siamna tur tui leh thing/gas man atan (conversion cost/cooking cost) min pe thin a ni. 'Naupang chu School-ah a ril a tam tur a ni lo' a ni tawp mai. Primary School-in an chhum hnuah, Mizoram-ah pawh Middle School leh Comprehensive School te pawhin 1st August 2008 atang khan School-ah chaw chhun kan ei tan ve kha a ni a.

Mizoram-a Mid Day Meal (a hming thar zawk PM Poshan tia lam tawh tur) kan kalpui mêkah hian tun dinhmunah Naupang pakhat Balvatika (Pre School) leh Class 1-5 te hian School kal ni apiangin buhfai 100g an dawng a, chawhmeh leh a bawlhlo atan Rs. 6.11p a ni bawk a. Class 6-8-a naupang pakhatin School kal ni apianga a dawn zat chu buhfai 150g niin, conversion/cooking cost hi Rs. 8.35p a ni thung. Chawhmeh atan naupang pakhatin artui pum khat a dawng pha lo tihna. Conversion/Cooking cost hian Tel, Chi, Aieng, Purun, Gas/thing leh thâl laia tui harsatna hmuna tui leina tur a huam vek bawk!

Zirtirtu fel leh fing tak tak, rem hre fe fe leh mathematics thiam tan pawh chawh dik a harin ziah dik lah a awlsam loh vei nen, thu hi kan awi thei phian a ni ang e. School-a chaw nghei êm loin kan insiam rem hram hram thei zel mai.

PM Poshan-a sum dawnte a beitham hle chunga tha taka kalpui a nih theih nan, vantlang atanga thil pek/vantlang thawhlawm (community contribution) thawh thei tura mipuite thawhpui thiam tur te a fuih kan ni a, hmun hrang hrangah hei hi a hlawhtlin hle laiin awmze awm vak lohna khua a tam ang tih a rinawm. Tin, Nutrition garden siamah te hma kan la bawk a. Keini School phei hi chuan kan thawhhlawkin thlai hrang hrang tharchhuak tam pawl tak pawh kan ni ve a. Iskut phei chu kan ngah thei viau a, tui an ti lem lo mai pawh a! Mahse, buhtun nena siam dan kan thiam tawh kha maw.

Tichuan, a harsa lai ber ni ta chu, conversion /cooking cost kan dawng tha lo êm êm thin hi a ni. Mahni District bil group-ah te zawhna zawtin phun phun ve mah ila, kan DPC te leh staff te chuan State Hqtrs hnena min thlensak bak chu min hnemna thu leh, pawisa dawnna order rawn upload bak kha an tan tih theih a vâng bawk si. Tunah pawh hian conversion cost kan hmuh loh thla hi June 2023 - February 2024 (thla 9 lai) a ni leh tawh. Ka hresual emaw te kha in lo ti ang e. Ka hre sual hauh lo a nia. Heti a ni chung hian School tinten thu awih takin chaw kan chhum zel a, a thenin mi dawrah kan ba a, thenkhatin Headmaster pawisa kan hmang a, zirtirtuten kan thawhkhawm chang pawh a awm. Kan fel asin!

Harsatna dang leh chu, heti khawpa chawhmeh siamna sum dawng mumal lo chunga register fel fai taka vawn tum hi a ni. Dâwt leh dâwt belhkhawmin 'dâwt' lianpuia chhuah palh hlaua fimkhur luatah, kan PM Poshan register te chu thin phu zawih zawih chunga keu a ngai a. Keu ngam loa lo dah tha veng veng an awm pawhin, kei zawng ka dem miah lo. A luhaithlak êm asin!

Harsatna langsar leh pakhat chu, chawchhumtu hlawh mawlh mai hi. State hrang hranga ka thiante nen group khata kan awmnaah zawhna ka siam hlawm a. A lo inang miah lo. Ka sawi vek lo ang. A duh chuan fiah ve mai se. Mizoram bikah Rs. 1500/- niin an la regular lo hle. Nutling patlingin buai takin chaw an rawn chhum a, thleng silfai leh choka tihfai hnu meuh chuan chawhnu dar 2 a lo pel leh mai thin. Ningnawi vawk chawa an hawn tur lah a in la sitrik zual keini angin, chaw thianghlim paih a awm em? Ei sên loh khawpa chhum a ni em? tih kan la check zui. Ka khawngaih thin. Chaw paih tlawrh tlawrh hi ka ngai thiam lova, chaw leh chawhmeh ei sên loh chhum/siam ka duh hek lo.

Nimahsela, chaw chhumtuten min bânsan mai loh nan tiin enrollment-a cook 4 nei thei khan, pali report-in pathum a taka thawhtirin; pakhat hlawh tur chu pathumah cheng 500 theuhin kan sem a, hming remchang kan hawh tawp mai a ni. Chaw chhumtute hlawh tlem lutuk vanga remhriatna kan hman hi a dik lo a nih chuan min lo hau hrep rawh u. Huanah an thawh tur àwm te dapkhawmin inhlawhna tur kan siamsak thin bawk a. Kum 2023-2024 academic session chu tlawmngaiin min thawh tluansak a. Session tharah erawh sawrkar thara beiseina nen sawhthing hmun lamah min liamsan diak dawn a. An chaw chhum hlawh session hluia sawrkarin a la batsak pawh thla 5 lai a la ni. An lainatawm takzet. Chaw chhûm tura hlawhfa zawn pawh a har tial tial a. A luhaithlak!

Hetiang a nih mêk lai hian kan buhfai dawn dan te lah, School atanga retailer hnai berin Supply department Godown atangin min laksak a. School ta tur china tih kha kan la a, card-ah ziahtir tur a ni. A dik leh dik loh chian tura Order copy Headmaster pek ve thin chu kum tam tak kalta atang khan tihtawp niin, kan dawng ngai tawh lo a. Naupang pakhat quota kan hriat chian em avangin, buhfai bag leh enrollment te kan lo en mil ve mai thin.

Hetiang harsatna School hrang hrangin kan tawh laiin, harsa zual bik kan la awm cheu. Tui harsatna hmuna awmten Thal khaw ro laiin tui lei nan sum kan hmang nasa hle thin. Chuvangin, khawngaih takin hemi bikah phei hi chuan kan khuaa School, tui harsa êm êmte kha tui trip hnih khata tanpuite hi i intihhmuh teh ang u.

A tawp berah chuan, ngaia kan lo neih tawh heng harsatnate hi ngaiah kan neih chhunzawm zel dawn nge? Tun sawrkar thar hian a tha zawnga hmasawnna engemaw tal min thlen dawn tih hi, awmhmunah kan lo thlir ve rauh rauh bawk a nia. Thal lai a lo ni leh ta a, khua a roin tui a vang leh dawn. Kan area ngat phei chu tui chawi motor-te pawh tlaivarin an intlar leh ang. Hetiang hunah hian chaw chhumsa tal nu leh paten an rawn paitir theih nân, an quota dik tak buhfai kha tui vàn chhung chu kan sem a, School-ah chawhmeh chauh siama harsat zual chhung kan lo insiamrem a nih pawhin, min lo ngaithiam hram hram hlawm a ni ang chu. Tichuan, PM Poshan chungchang bika tih theih nei zawng zawng, kan hotu fing fel tak takten theihtawp chhuaha tun aia tha zawk kalphung thar kan neih theih nan hma la ngei turin ka'n ngen ngawih ngawih a che u. 'Naupang chuan ni tin sikulah chhun chaw a ei ang a, a riltam tur a ni lo' tih hi, rilru thlamuang taka kalpui a nih theih nan, kan Education Minister leh a thawhpuiten theih tawp chhuahin hma min lo laksak mawlh teh se.

Comments

Popular News (Last 30 Days)

Vawiin-ah HSSLC Exam result

LPG man bithliah thar