Kum 2024-a kawlphetha pekchhuahna atana P&E Department sum mamawh vbc. 781.97

Power & Electricity Department-in kum 2024-25 chhunga mipui hnena kawlphetha pekchhuahna atana sum leh pai a mamawh (Aggregate Revenue Requirement) chu cheng vbc. 781.97 nia chhut a ni a. Kumthar atana kawlphetha hman man tur bithliah chungchanga sawiselna nei duhte tan hun hawn chhungin mi pakhat hnen atang chauhin sawiselna (complaint) hi dawn a ni.

Joint Electricity Regulatory Commission (JERC) for Manipur & Mizoram huaihawtin kar kalta Ningani khan Aijal Club-ah kum thar atana Mizoram-a kawlphetha hman man chungchanga sawiselna awmte ngaihthlakna, ‘Public Hearing’ neih a ni a. He huna P&E Department thawktute tarlan danin kumthar atana Department sum mamawh ‘ARR’ chu cheng vbc. 781.97 a ni tih sawiin, heta tang hian State chhung atanga êng chhit man atanga sum hmuhlet tura beisei chu cheng vbc. 433.39 niin State pawna power hralh man atanga sum hmuhlet beisei chu cheng vbc. 137.35 a ni. 

P&E thawktute sawi danin kum 2024-25 chhung hian Power million unit 748.89 hralh tur an nei dawn a, heng zinga MU 544.79 hi State chhunga hralh/hman tur a niin a dang, MU 204.10 hi State pawna hralh tura ruahman a ni. Kum khat chhunga P&E Department-in kawlphetha hman man atanga sum a mamawh cheng vbc. 781.97 atanga State chhung leh State pawn-a hralhna atanga a hmuhlet tur cheng vbc. 570.74 niin, sum indaihtlohna tur hi vaibelchhe 211.23 a ni a, hei hi sawrkar chuan subsidy-in a tum sak dawn niin an sawi.

JERC for Manipur & Mizoram Public Hearing-ah hian Vanlalruata, Tuikual South hnen atang chiahin complaint a lut a. Vanlalruata hian P&E Department-in kumthara thawktute hlawh (employees cost) atan sum dah cheng vbc. 135.59 chu a tam lutuk niin a sawi a. “Manipur chu Mizoram aia mihring leh khua pawh a let thum vela tam a niin thawktu pawh an tam zawk a. Heti chung hian power mamawh tlem zawk leh thawktu pawh awm tlem zawkna Mizoram-ah hnathawktu hlawh Manipur aia a sang hi pawm a harsa a ni,” a ti.

Hei bakah hian Department-in Working Capital atan cheng vbc. 9.93 an dah chu pawm harsa a tih thu sawiin, “Company emaw, Corporation-ah emaw chauh Working Capital hi dah thin a nih laia sawrkar hnuaia awmin Working Capital an siam hi a dik lo,” a ti a. Eng chhit man chu mipuiten an pek that laiin Department lamin an pe tha lo nia a hriat thu a sawi bawk.

P&E Department-a thawktute chuan hlawh atana sum an dah chu hnathawktute hlawh bakah damdawi-a inenkawlna senso nen belh vek a ni tih an sawi a. Manipur chuan an State-a hman tur Pay Commission neiin an hmang a, hei vang hian an hlawh hi a hniam niin an sawi a. Working capital pawh State sawrkar sum senna a nih avang leh Commission-in a phalsak ang ngeia dah thin an ni tih an sawi bawk.