Sawhthing leh Hmarcha-ah Crop Insurance tih theihin inziahluhna hun hawn mek a ni

Mizoram sawrkar in Crop Insurance kalpui a tum angin thlai thenkhat- Sawhthing, Hmarcha, Zikhlum leh Bawkbawn-ah te Crop Insurance hi kalpui a ni dawn a, a hmasa atan Sawhthing leh Hmarcha-ah Crop Insurance hi tih theih niin Insurance tihna man hi sawrkar in Mizoram Hand Holding Scheme atangin a tum then sak dawn a ni.

Hemi chungchang ah hian Serchhip-a District Horticulture Officer (DHO) chuan nimin khan Serchhip District-a Village Council hrang hrangte hnenah lehkha thawnin Pradhan Mantri Fasal Bima Yojana (PMFBY) chungchang hi a hriattir a. He lehkha ah hian PMFBY Flagship Crop Insurance Scheme hnuaiah Sawhthing, Hmarcha, Zikhlum leh Bawkbawn-ah te Crop Insurance a tih theih a nih thu leh tun atan chuan Sawhthing leh Hmarcha chauh hi mahni khua a Common Service Centre (CSC)-ah November 21, 2025 ralhma a tihfel tur a ni tih a tarlang a ni.

PMFBY Flagship Crop Insurance Scheme kalphung tlangpui pawh tarlang nghalin, he ruahmanna hnuaiah hian Sawhthing, Hmarcha, Zikhlum leh Bawkbawn-ah te Insurance a tih theih thu leh Insurance ti duh tan ‘Land Possession Certificate in lieu of Land Records for PMFBY form’ thil tel ngaiin, he form ah hian Village Council President Seal leh signature a ngaih avangin Sawhthing leh Hmarcha ching ngei leh Ram Pass/VC ram theh nei te chauh hming sign sak tur a nih thu a tarlang a. Insurance tihna man hi sawrkar in Mizoram Hand Holding Scheme atangin Subsidized a nih dawn thu pawh tarlangin, hectare khat aia zim-ah sawrkar in zaa 90 tumin Farmers ten zaa 10; hectare 1 atang hectare 5-ah sawrkar in zaa 80 leh Farmer in zaa 20 tumin hectare 5 aia zau-ah chuan sawrkar leh Farmer ten zaa 50 ve ve an tum dawn a ni.

Insurance tihna man hi Sawhthing leh Hmarcha-ah Hectare 1 atan Rs. 1607.25 niin Zikhlum-ah Rs. 2699.71 leh Bawkbawn-ah Rs. 2911.64 pek tur a ni a, He sum hi enrollment tihna ah pek tlak nghal vek tur niin sawrkar in a subsidized-na hi Farmer te Bank Account-ah a chhunglet leh dawn a. Enrollment ti tur te Phone Number, Adhaar leh Bank Account a in link ngei tur niin KCC hnuaia Loan rul mek te tan Bank-ah enrollment hi tih tura ni Common Service Centre-a Enrolment ti tur tan Adhaar xerox copy, Pass book phek hmasa ber xerox copy leh Land Possession Certificate in lieu of Land Records for PMFBY (VCP signature chuang ngei ken tur a ni ang.