Social Welfare Minister-in ‘Survey Report on Drugs and Children in Mizoram 2022’ a tlangzarh

Social Welfare Minister Dr. K. Beichhua chuan nimin khan ‘Survey Report on Children and Drugs in Mizoram 2022’ chu tlangzarhin, naupangte zingah zuk leh hmuam, ruihtheih thil ti an tam ta lutuk chu pawi a tih thu a sawi.

‘Survey Report on Children and Drugs in Mizoram 2022’ tlangzarhna hun Secretariat Conference Hall-a neih ah hian Dr. K. Beichhuak chuan ram leh hnam chhan nan ruihhlo do a tul thu sawiin, naupangte zingah zuk leh hmuam, ruihtheih thil ti an tam ta lutuk chu pawi a tih thu a sawi a. Vawikhat tihchhin a pawizia leh nghawng tha lo nasa tak a neih theih thu sawiin, naupang te an nihlai atanga zirtirna (awareness) pek a pawimawh thu leh Ruihhlo, Zu, Drugs leh a kaihhnawih dona kawngah mipui, khawtlang leh NGO te tanrual a pawimawh thu a sawi a, “Ruihtheihthil leh rilru lam kaihhnawih harsatna a kalkawp tlat a, naupang leh thalai ah rilru buaina, beidawnna, tha tawkloa inhriatna, intihhlum duhna hial a thlen nasa em em a ni,” a ti bawk.

Ruihhlo hmansual chungchang naupang bika zirchianna, 'Study on Drugs and Children in Mizoram 2022' hi India rama state sawrkar bik Fund-na hnuaia naupangte zirchianna awm hmasa ber a ni a, ram tana mellung pawimawh tak a ni. He Survey-in a tum ber chu tleirawl leh rawlthar kum-18 hnuailamte ruihhlo leh a kaihhnawih chungchanga an dinhmun leh an derthawnna zirchian a ni a. Naupang kum-10 leh 17 inkar Middle School, High School, Higher Secondary School leh School kal tawhlo (School dropout)-ah te Drug Survey hi neih a ni.

Survey Report atanga a lan danin Naupang School kallai mek leh kal tawh lo (School dropout) te pawhin ruihhlo hi an lo hmelhriat hle tawh a, naupang ruihhlo tih tan kum te pawh a kum telin a hniam chho zel a, naupang School kal chhunzawm lo (School dropout) thenkhatte chu ruihhlo an khawih vang a ni tlangpui a, Ruihhlo chak zawkah lut chhovin an tih tam mai bakah an ti zing tial tial a ni. Zirchianna atanga lan danin naupang ruihhlo ti thin te zingah rilru lam kaihhnawih harsatna (inattention, anxiety leh depression, etc) a tam phah ni a hriat a ni a. Khawvel pum huap pawhin ruihhlo hmansual leh rilru lam kaihhnawih harsatna hian inkungkaihna a nei nia hriat a ni bawk.