Latest News

Power MW 4 pe thei Kawlbem SHP hawn a ni

Kawlphetha MW 4 (2x2) pechhuak thei tur Kawlbem Small Hydel Project chu nimin khan Power & Electricity Minister R. Lalzirliana chuan a hawng.

Kawlbem Eldee Indoor Stadium-a Kawlbem Small Hydel Project hawnna puala inkhawm neih ah P&E Minister chuan Kawlbem Small Hydel Project puitlin a ni thei chu lawmawm a tih thu sawiin, Mizoram Sawrkar chuan kawlphetha lama kan intodelh theih nan theihtawpin hma a la a ni, a ti a. Chung hmalakna zinga pawimawh tak Kawlbem 4MW SHP peihfel a ni chu lawmawm a tih thu a sawi a ni. 

Power Minister chuan Kawlbem Small Hydel Project siam nan hian cheng nuai 4960 hman niin, kumtin kawphetha 6.67 Giga Watt hour vel zet a siamchhuak tura beisei a nih thu a sawi a; hei hian Mizoram in kawlphetha lei nana sum kan hmanral thin engemawzah min chhawk thei dawn a ni, a ti bawk a. Ni zung chakna khawlkhawma hmang turin project kalpui mek zel a nih thu leh Hydel project hrang hrang kan ram mamawh phuhruk tur siam turin Central Public Sector Units (CPSU) te nen indawrna neih chhoh mek zel a nih thu te a sawi bawk.

Kawlbem Small Hydel hi Indoor Sub Station a ni a, Mizoram hmun danga la hman ngai loh Pelton Turbine hman a ni. Project hi kum 2014 atanga thawh tan niin thawh zawh hun tur a tira ruahman (Target date of Completion) chu March, 2017 a ni a, November 2022 khan hlawhtling taka endik niin zawhfel a ni. Kawlbem Small Hydel Project siam nan hian Estimated amount chu cheng nuai 4960 niin, Revised Estimate siam ngai lova zawhfel a ni a. Nimin-a a hawnna hun hi H. Lalengmawia, IAS, Commissioner and Secretary P&E Department chuan a kaihruai a ni.

Comments

Popular News (Last 30 Days)