Nakum atangin Two Wheeler Taxi intlanchhawk rel

Home Minister Lalchamliana hova Coordination Committee on Traffic Management nimin-a SAD Conference Hall-a thukhawm chuan nakum atangin Aizawl khawpuia Two Wheeler Taxi intlanchhawk turin an rel.

Nimin a Coordination Committee on Traffic Management thutkhawm ah hian Aizawl khaw chhungah Two Wheeler Taxi 3294 zet a awm tawh thu tarlan niin, inrelbawlna fel zawk a awm theih nan leh Traffic tawt lutuk tihziaawm nan Two Wheeler Taxi hi Group 3-ah thenin, nakum January ni 1, 2023 atang chuan intlan-chhawk tawh se ti a rel a ni a; State Transport Authority (STA) in Commercial Vehicle-te tlan man (rate) a bituk ang taka kalpui a nih theih nan nasa lehzualin STA in hma la se an ti bawk.

Kumdanga tih thin angin kumin 2022 Krismas leh Kumthar vuakveta ‘No Vehicle Zone’ siam leh tha ti bawkin, December 23, 24 leh 31, 2022-ah ‘No Vehicle Zone’ hi siam leh a ni ang.

He meeting hian Aizawl khawpui chhunga Traffic Management/Urban Transport chungchangah thuneitu hlawm pakhat, Unified Urban Transport/Traffic Management Authority awmin UD&PA Minister Chairman-na hnuaiah awm se, a kaihhnawih hrang hrangte tel bawk se an ti a. Dan tanchhanin thuneihna leh tihtur mumal takin duan nise, Aizawl khawpui chhunga Traffic Management kaihhnawih lian thamah chuan thutlukna leh ruahmanna siam thin se an ti bawk.