Serchhip-ah Mathematics Competition neih a ni
Mizoram Mathematics Society (MMS) leh Mizo-ram Science Technology & Innovation (MISTIC) in an buatsaih Mathematics Competition hi Mizoram hmun hrang hranga Centre-ah neih niin Serchhip-ah pawh Govt. HSS Centre-ah neih a ni a, Competition-a tel tura inziaklut hi Class V-ah 46, Class VIII-ah 48, Class X-ah 90 leh Class XII-ah 11, an vaiin mi 195 an awm a, an zinga 159 in intihsiakna hi an hmachhawn a, an zingah hian Serchhip bakah District chhunga khaw dang atanga rawn kal te pawh an tel a ni.
Mathematics Competition hi kumtin-a buatsaih thin niin kumin hi a vawi 14-na a ni a, zirlai naupang ten Mathematics-ah hma an sawn lehzual theih nan leh Mizote rilru-ah Mathematcs Subject chu har tura ngaihna awm thin te tihbona atan he inelna hi neih thin a ni a, Class hrang hranga a titha te hnenah lawmman hlan thin niin tun tum intihsiakna lawmman hi tun thla ni 22 khian Aizawl-ah sem a ni ang.
Comments
Post a Comment