Latest News

Serchhip-a neih Mizoram Secondary School Games 2022 chu zawhfel a ni ta

Tunkar Thawhlehni atanga Serchhip-a neih 39th Mizoram Secondary School Games chu nimin khan zawhfel a ni ta a, a pumpui-ah Saitual District chu an Champion a ni.
Mizoram Secondary School Games kharna hun hi nimin khan Serchhip P&E Veng-a Leisekawt Mual-ah neih niin khuallian nia hmanpuitu School Education Secretary Dr. Lalzirmawia Chhangte chuan hripui leng vangin School Games hun rei tak kan neih theih tawhloh hnuah Secondary School Games tluang tak leh hlawhtling taka kan nei thei chu lawmawm a tih thu a sawi a. Infiamna hi mihring inchherna (personality building) atana thil tangkai tak a ni tih sawiin, Life Skills min zirtiru tha tak a nih thu a sawi a. NEP 2020 chuan Tawnhriat hmanga zirna (Experiential Learning) huang chhungah khungin, Zirna leh Sports inbelhbawm (Sports integration) hi subject curriculum hrang hranga zirtina hmanruaa hman turin a sawi thu a sawi bawk.


Mizoram Secondary School Games-ah hian Aizawl District chu Aizawl North leh South-ah then niin District 12 atangin zirlai leh zirtirtu 696 an tel a. Infiamna discipline 5- Athletics, Badminton, Football (Mipa), Table Tennis leh Volleyball (Hmeichhia) hmanga inelna neiin Saitual District chuan Gold 4, Silver 3 leh Bronze 2, a vaiin Medal 7 lain an Champion a. Ethel Lalpekhlui, Govt. N.E. Khawdungsei H/S (Saitual District) chu Best Athlete (Girls) niin Gold 2 leh Silver 2 a la a, Saitual District chu Athletic Girls-ah Team Champion an ni. ZD. Lalhunruata, Govt. G.M H/S (Champhai District) chu Best Athlete (Boys) niin Gold 1 leh Silver 1 a la a, Champhai District chu Athletics Boys category-ah Team Champion an ni bawk.

Badminton (Boys Team)-ah Serchhip District Champion in Badminton (Girls Team)-ah Aizawl District South an champion a. Football (Mipa)-ah Kolasib District champion in, Volleyball (Hmeichhia)-ah Khawzawl District an champion a. Table Tennis Girls Team-ah Kolasib District, Table Tennis Boys Team-ah Aizawl District South leh Open Table Tennis Single Boys-ah Hnahthial District an Champion a, Open Table Tennis Single Girls-ah Aizawl Distict South an Champion bawk.

Mizoram Secondary School Games kharna hun hi Directorate of School Education Jt. Director Zohmingthanga chuan kaihruaiin School Education Director Dr. H. Lalthlangliana chuan khual zahawm niin a hmanpui bawk a ni.

Comments

Popular News (Last 30 Days)