Mizoram Secondary School Games vawi 39-na Serchhip-ah neih tan a ni

Mizoram Secondary School Games vawi 39-na chu nimin khan Serchhip-ah neih tan a ni a, tunkar Zirtawpni thleng awh tur he School Games hi Serchhip Sports Complex-ah Assembly Deputy Speaker Er. Lalrinawma chuan a hawng a ni.
39th Mizoram Secondary School Games hawnna hunah hian Deputy Speaker chuan rilru leh taksa hriselna atan infiamna chi hrang hrangte a pawimawh thu sawiin, tunah phei chuan eizawnna a ni mek tawh tih a sawi a, chutiang a nih mek laia zirlaite tana an thiamna leh theihna te haichhuahna hun remchang buatsaih a ni chu lawmawm a tih thu a sawi a. Infiamna hian taksa leh rilru hriselna a ken tel avangin kan taksa uluk leh duat taka enkawl a tulzia kan zirchhuaha, kan hriselna kan ngaih pawimawh deuh deuh a tul thu a sawi a. Pathian in kan taksa chu thil chi hrang hrang ti thei tura a siam a ni tih pawh sawiin, chutiang ti thei lo tura kan taksa tichhe thei Zu leh ruihtheih thil lakah Pathian in finna min pek hmanga kan enkawl a tul thu a sawi a. he rama piang-a seilian kan nih chuan kan ram a chhiat a that ah mawhphurhna kan nei tih hre reng tura he huna kalkhawmte chu chahin, mahni mawhphurhna hlen tum theuh turin a chah bawk a ni.

Serchhip District Education Officer Lawmawma kaihhruai he hunah hian khualzahawm School Education Department-a Addl. Director Lalthanzama chuan zirna kalphung thar ah Sports lam ngaih pawimawh a nih dan te sawiin, tuna Subject hrang hrang naupang ten an zir ang hian Sports Subject hi kan la zir thei dawn tih a sawi a. Hei bakah hian School Education Department hnuaia zirtirtu te chuan an thiamna in a tlin a nih chuan zirna Stage hrang hrang, an tuina ah zel an thawh theihna turin ruahmanna a awm mek thu a sawi bawk.

Mizoram Secondary School Games-ah hian Mizoram District 11 tel kimin Aizawl District chu North leh South-ah then niin a vaiin District 12 an inel dawn a. Athletics Items hrang hrang panga (5) bakah, Badminton, Table Tennis, Volleyball (Hmeichhia) leh Football (Mipa)-ah intihsiakna neih tur niin District hrang hrang atangin zirlai naupang mipa 348 leh hmeichhia 282, an vaiin mi 630 bakah Zirtirtu mi 66, an vaiin mi 696 an tel dawn a, Athletics leh Football hi Serchhip Sports Stadium-ah inelna neiin Badminton leh Table Tennis te hi Serchhip Indoor Stadium-ah khelh a ni anga, Volleyball hi Vengchhung Volleyball Court-ah khelh a ni bawk anga. Tunkar Zirtawpni khian zawhfel tur a ni ang.