Chekawn leh Artahkawn inkar kawng siam

Tuichangral South Group YMA huamchhunga Chekawn leh Artahkawn inkar kawng chhe lutuk siamthat hnatlang chu nimin khan Tuichangral South Group YMA huaihawtin neih a ni.
Tuichangral-a awm te inkalpawhna kawng pawimawh tak pakhat, Chekawn leh Artahkawn inkar hi kum engemaw zat siamthat a nih tawh loh avangin lirthei tan pawha kal harsa khawpin a chhe tawh a, hunpui lo thleng turah mipui veivak ten harsatna an tawh lohna tura hnatlangpui neia kawng siam hna hi an thawh thu an Group YMA hruaitute chuan an sawi a ni. He hnatlang ah hian an Group YMA huamchhung atangin mi 300 vel an thawkchhuak a, JCB pahnih leh Tipper pahnih bakah lirthei dang engemaw zat thawkchhuahpuiin kawng khuar zual te chu hnawh a ni a, pawl leh mimal engemaw zatin sum an thawh bawk a ni.

Hetihlai hian bialtu MLA leh Home Minister Lalchamliana chuan Chekawn to Artahkawn leh Biate to Tuipui inkar kawng siam nan Central atangin Special Assistance to States for Capital Investment Scheme hnuaiah Nov. 14, 2022 khan cheng vbc. 7.39 chu approved fel tawh anih thu sawiin, Expenditure Sanction dil mek a nih thu a sawi a. PWD pawhin an hmanhmawh pui thu leh Tender tura buaipui mek niin March 31, 2023 chhunga zawhfel tur a nih thu a sawi bawk.