Serchhip-ah District Level Workshop on Good Governance Practices (Sushan Saptah Prashasan Gaon Ki Aur), 2022 nei a ni
India sawrkar chuan December 19 atanga 25 chhung hian ‘Good Governance Week’ hmang turin ruahmanna a siam a, hemi chhung hian tihtur (activity) hrang hrang rawn duangin, December ni 23, 2023 khian ‘Workshop on Good Governance’ neih tur a ni a. Amaherawh chu ni 23 hi Krismas a hnaih tawh em avangin Vawiin khan Workshop bik hi Serchhip DC Conference Hall-ah hman niin Serchhip-a Head of Offices te an tel a. He hun hi Serchhip SDO (Sadar) Lalzikpuii chuan kaihruaiin khuallian nia he hun hmanpuitu Serchhip District Bawrhsap mawhphurhna la mektu Lalmuansanga Ralte chuan sawrkar hnathawkte chu mipuite tana thawk tur, an hun puma thawk tura lakte an nih avangin an nunah an hna a hmasak ber a ngai tih a sawi a. “Ka tihtur hmasa ber hi kan hriatchian chuan hnathawktu tha kan ni mai dawn a ni. Kan hna aia ngaihpawimawh zawk hna dang kan neih a rem lova, chutiang kan nei a nih chuan kan hna kalsanin chu chu kan pan ngam mai a tha zawk awm e,” tiin sawrkar hnathawkten an hna an ngaihhlut a tul thu a tarlang a. Ram tha leh hmasawn neih kan duh a, chutiang nei thei tur chuan hnathawktute hian kawng tam takin mawh kan phur a ni, a ti bawk.
He hunah hian Lalhruailiana Zote MCS, SDC chuan ‘Good Governance Initiative - DC Online’ tih thupui hmangin Serchhip District chhunga mipuite tana awlsamna a awm theih nana Online hmanga Deputy Commissioner Office in Certificate hrang hrang a pekchhuah dan sawifiahna a nei a. Serchhip District-ah Village Council 54 an awm laiin Common Service Centre 77 an awm a, khaw 5-ah Common Service Centre an awm lo thung a, khaw tam takah CSC hi pakhat aia tam an awm tihna a ni. DC Online atang hian Income Certificate 2503, Residential Certificate 1438, Permanent Residential Certificate 55 leh Tribal Certificate 1717 pekchhuah a ni tawh a ni.
Ani bakah hian F. Lalnisai MCS, SDC pawhin ‘Good Governance Initiative- Visit of Schools’ tih thupui hmangin tunhnai maia Serchhip Deputy Commissioner Officer ten District chhunga sawrkar School hrang hrang 129 an tlawh dan leh heng School ten hma an sawn theih nana hma an lak dan tlangpui sawina hun a hmang ve bawk a. Thusawi te an ngaihthlak zawhah kalkhawmten Good Governance chungchang sawihona an nei zui bawk.
Comments
Post a Comment