Latest News

National Green Tribunal-ah Mizoram sawrkar inlan

National Green Tribunal, Principal Bench in State hrang hrangte hearing a neih kal chho mekah Mizoram sawrkar chu tun thla ni 8 khan inlan tura koh niin Chief Secretary, Dr. Renu Sharma chu Mizoramm sawrkar aiawhin a inlan a ni.

He Hearing-ah hian bawlhhlawh sawng-bawl dan chungchanga India rampumin Dan kan hman mek, Solid Waste Management Rules, 2016 hnuaia Mizoram sawrkar hmalakna te, Mizoram chhunga lui-te an lo thianghlim zawk nana kan tuichhe sawngbawl dan chungchang te sawiho a ni a. Hmalakna tur engemaw zat sawichhuah ni mah se a hranpain NGT hian Mizoram sawrkar sum a chawi tir lo a ni.

National Pollution Control Board leh State sawrkar atanga report an dawn te uluk taka an en hnuah NGT chuan Mizoram chhunga bawlhhlawh leh tuichhe sawngbawl nan cheng vbc. 50 mamawh nghal a nih thu leh Mizoram sawrkar chu a tul anga sum ruahman turin an hriattir a. Hemi denchhen hian Chief Secretary chuan Mizoram sawrkarin kum kal meka bawlhhlawh leh tuichhia sawngbawlna tura sum a ruahman dan te a sawifiah a, sum mamawh zat NGT ten an sawi pawh kum kal meka sawrkar sum ruahman sain a cover vek thu hrilhin, Sawrkar leh mipuite tanrualna zara Mizoramin faina leh bawlhhlawh sawngbawl kawnga hma kan lak dan te chipchiar takin a sawi bawk. 

Mizoram sawrkar hnathawh mek leh ruahmanna hrang hrangte an ngaihthlak hnuah NGT hian Chief Secretary rawtna chu pawm sakin pawisa an chawitir ta lo a. Chutih rualin kum kal meka bawhhlawh leh tuichhia sawng-bawlna tura sum ruahman sa hrang hrangte chu uluk lehzuala lo enzui a, lo vil turin Chief Secretary hi an hrilh a ni.

Comments

Popular News (Last 30 Days)