FSL-ah Kutze thla 5,982 kawltha tawh

Mizoram Forensic Science Laboratory (FSL) chuan Police ten an man pawikhawihtu hrang hrangte kutze thla (fingerprint) 5,982 an nei/kawl tha tawh a, kumin January - November chhungin thubuai 1,082 khawihin heng atang hian finfiahna 23,959 zirchian an nei.

Mizoram Forensic Science Laboratory-in tun thlenga kutze thla an neihte hi pawikhawihtu convict (thiam loh chantir) tawh mi, 3,373-te kutze thla leh pawikhawihtu an man tawh mi 2,609-te kutze thla a ni a. Police leh Excise department-ten thubuai endik tur an pek atangin kumin thla 11 chhungin thubuai 1,082 an endik tawh a ni.

Mizoram Forensic Science Laboratory-a thawktute hi pawi-khawihna a lo thlenin a hmuna endik turin koh thin an ni a, hmun hrang hrangah kal kualin finfiahna awm thei angte an lakhawm thin a, kumin chhungin pawikhawihna thlenna hmun 80-ah kalin an endik tawh a, Court-a thubuai an dinpui chu 211 a tling tawh bawk a. Pawikhawihtute manchhuahna kawngah Police kutke tangkai ber pakhat an ni.