Mizoram PWD-a hotu lian ni thin mi pahnih Sum tih chingpen thubuai ah thiamloh chantir leh

Special Court (Prevention of Corruption Act)-in kum 2007-2008 chho-a Serkhan leh Bagha inkar kawngpui siamna tur sum tihchingpen thubuaiah khatihlaia PWD Engineer-in-Chief, Liansanga leh Chief Engineer, Lianchungnunga te thiamloh a chantir a, Vawiin-ah hremna tur puan a ni ang.

Thudawn danin he thubuai lo intanna hi November ni 3, 2009-a khatihlaia Hmarphei Zirlai Pawl President B. Laltanpuia’n Serkhan-Bagha Road kawng siam chungchangah eirukna awm ngei a hriaa ACB-a complaint an thehluh vang a ni a. He thubuai chhui zuina atanga a lan danin Finance Commission 12-na hunlai kum 2007-2008 chhoah khan Mizoram Sawrkar chuan Sawrkar laipui atangin kawngpui siamthat leh Lei dawhna atan cheng nuai 1,053 a dawng a. He sum atang hian khatihlaia PWD Engineer-in-Chief, Liansanga chuan PWD Chief Engineer, Lianchungnunga hnenah Serkhan-Bagha kawng siamna atan cheng nuai 175 a pechhuak a, Lianchungnunga hian cheng nuai 155 chu Kolasib EE PWD hnenah pein, cheng nuai 20 la bang chu remchang danga pekchhuah leh turin a kawl tha a. He sum bakah hian Mualkhang-Hortoki kawng siam nana ruahman Rs. 87,67,147/- chu Serkhan-Bagha Road siamna atan Kolasib EE hi pek a ni bawk a, Serkhan - Bagha Road siamna atana EE Kolasib kuta sum dahz awng zawng chu Rs. 2,42,67,147/- a ni a. EE Kolasib hian Rs. 87,67,147/- chu Lianchungnunga hnenah ah 31.03.2008 khan a pelet (Surrender) a, cheng nuai 20 a lo kawlthat nen Rs. 107,25,000/- chu Liansanga hnenah peklet a ni ta a, Lianchungnunga kutah hian Rs. 42,147 chu a bothlau a ni.

Hetihlai hian CAG report-a a lan danin 12th Finance Commission-in Mizoram PWD hnena kum 2007-2008 chunga pawisa a pek atanga Serkhan Bagha Road siamna tura ruahman chu a bo a bang awm lova hman zawh vek a ni tih tarlan a nih thung avangin E-in-C, Lian-sanga chu Rs. 107,25,000 tichingpena ngaih a ni bawk a.

Hei bakah hian Finance Department-in Mizoram PWD hnenah kum 2004 atanga 2009 chhung khan Serkhan Bagha Road thawm-thatna atan cheng nuai 696 a pe a, heta tang hian PWD E-in-C Liansanga chuan Kolasib EE hnenah cheng nuai 435.24 a pechhuak a, a la bang cheng nuai 260.81 chu thuneitu (Competent Authority) te remtihna tel lovin hmun danga hman a ni a, hmun danga sum an hman atang hian cheng nuai 182.55 chu hmanna hriat lohvin a awm a ni.

Hetiang a nih avang hian Liansanga hi cheng nuai 107.25 tihchingpen leh thuneihna hmansual (Abuse of Official position) chung-changah thubuai siam sak niin, Lianchungnunga pawh sum tihchingpen bakah cheng nuai 20 a pekkir loh avanga luangral ta chungchangah thubuaitu chhuitu ACB hnena thudik lo hrilh-a puh niin thubuai siamsak a ni a. An pahnih bakah hian khatihlaia PWD Accountant, B. Lalthanpuia chu sum hman ralna lehkha lem siam leh mi signature siamchawpah puhin thubuai siam sak a ni bawk.

He thubuai ngaihtuahtu Special Judge (Prevention of Corruption Act), Dr. HTC Lalrin-chhana chuan Liansanga leh Lianchungnunga chu puh an nihnaah hian thiamloh a chantir a, B. Lalthanpuia erawh puh a nihna ah hian finfiahna that tawk hmuh a nih loh avangin chhuah zalen a ni thung a ni.

Court-in thiamloh a chantir Liansanga leh Lianchungnunga te hi nimin khan Central Jail-ah dahluh nghal an ni a, Court in hremna a pek dan tur chu Vawiin hian puan a ni ang.