Bilkhawthlir in dan lova Kuhva lakluh an dang tan

Myanmar atanga Kuhva ro rawn lut te dangchat turin nimin atang khan Bilkhawthlir-a Kuhva chingtute chu an Duty tan.

Bilkhawthlir Kuhva Chingtute chuan dan lova Myanmar Kuhva rawn lut avanga harsatna an tawh chingfel tura sawrkar an nghah hnuah hmalakna an hmuh tak loh avangin nimin atang khan dan lova Myanmar kuhva rawn lut dang chat turin duty an nei tan tih sawiin, nimin vek khan Bilkhawthlir Kuhva Chingtute hian Bilkhawthlir huamchhunga Kuhva godown hrang hrangte an enfiah nghal a, godown pakhata Myanmar kuhva an lo senghawi bang bag 120 lo awm chu phurchhuakin an halral nghal a ni a. Bilkhawthlir Kuhva Chingtute hian Myanmar Kuhva dang hian chhun zan zawma duty neih chhoh an tum a ni.

Tarlan tawh angin dan lova Myanmar Kuhva rawn lut avang hian Assam lamin tualchhung Kuhva thar pawh kaltlangtir an phal tak loh avangin Bilkhawthlir-a Kuhva hmun leisa hnamdang tam takin phai lamah an keng thei lo a, hei vang hian an lei sa pawh lawh lohin engemaw zat an la dah a, Kuhva la hralh loh te pawh hi hralhna an hre ta lo a ni. Hei mai bakah hian kumdangah chuan tun ang hunah hian kuhva thar leh tur pawh hnamdang hian an lo khar lawk thin a, kumin ah erawh kuhva khar tur zawng pawh an awm tak loh avangin Kuhva chingtute an mangang tawh hle a, hei vang hian an theih ang tawkin hma hi an la ta a ni. Bilkhawthlir-ah hian kuhva chingtu chhungkaw 800 vel an awm mek a ni.