Kum 2 tang tur leh nuai 15 chawi turin hrem

Special Court (Prevention of Corruption Act) chuan kum 1995-1998 chhunga P&E Department-a Chief Engineer Liansanga, Khatla Aizawl chu thiamloh a chantir hnuah kum 2 tang tur leh cheng nuai 15 chawi turin a hrem a, hrem a nihna hi bail theih niin Vawiin-ah bail a dilna chu Court in a ngaihtuah leh ang.

Nimin lama tarlan tawh angin Liansanga hi Kau-Tlabung Hydel Project leh Tuipang lui Mini Hydel Project chungchangah Court chuan thiamloh a chantir a, heng Hydel Project pahnih siamna ah hian sum indaihloh chhuanlamin tum engemawzat Revised Estimate siamin Sawrkar-ah sum an dil belh a. Hei hi thil dik lo a nih piah lamah nasa takin hna a khaihlak a, heng Hydel Project pahnih-ah hian kawlphetha siamchhuah hun tura ngaih ah siamchhuah theih a nih loh avangin Mizoram Sawrkar sum hloh chu cheng nuai 1,839.10 tlinga ngaih a ni.

Hetianga thiamloh chantir a nih hnuah hian nimin khan a hremna tur chu Special Court Judge, Dr. HTC. Lalrinchhana chuan puangin kum 2 chhung Jail tang tur leh cheng nuai 15 chawi turin a ti a, pawisa chawi tur a neih loh chuan kum 15 dang lungin tang turin a ti bawk a. Bail a dilna chu Special Court (Prevention of Corruption Act) chuan Vawiin hian a ngaihtuah leh dawn a ni. Thudawn danin, he thubuai ah hian sum faia eirukna a awm lo a, hna a rinawm loh vanga hremna lekkawh a ni.