PM in Governor leh Chief Minister a kawm

Prime Minister Narendra Modi chuan Zirtawpni tlai khan ramchhunga State leh UT tin Governor leh Lt. Governor bakah Chief Minister te Video Conference a neihpui a, Mizoram atangin Chief Minister Zoramthanga pawh a tel a ni.

India in G-20 Presidency dinhmun a chelh chungchanga G20 Meeting peng hrang hrang thlen tur inbuatsaihna kal mek chungchanga Video Conference neih hi Union Home Minister Amit Shah chuan kaihruaiin Indian Emissary to G20 Amitabh Kant chuan G20 meeting thleng tur State te tana hriat tur pawimawh hrang hrang te tarlangin presentation a pe a. Prime Minister chuan State tin thawhhona a pawimawh thu sawiin, G20 Presidency India in a chelh chhung hian khawvel hmuh ah India ram hmasawnna leh ropuina te phochhuahna hun tha a ni tih hriain, mitin lungrual leh thahnemngai taka thawhho pawimawhna a sawi a. State hrang hrang mawina leh potential te pholan nan India ram khawpui hrang hranga meeting hmun ruahman a nih dan sawiin, State tin ten an theihna lo phochhuak a, hmasawn an remchangah an hman ngei a beisei thu a sawi bawk.

G-20 hi ram 19 leh European Union te'n khawvel pum economy a harsatna thlentu hrang hrang sutkian leh hmasawn tlan theihna tura forum din a ni a. Member-te chu Argentina, Australia, Brazil, Canada, China, France, Germany, India, Indonesia, Italy, Japan, Mexico, Russia, Saudi Arabia, South Africa, South Korea, Turkey, United Kingdom, United States leh European Union an ni.