Ram hmasawn zelna ah kan khawtlang nun a siamthat ngai tam tak a awm - Chief Minister

Chief Minister Zoramthanga chuan ram hmasawn zelna ah kan khawtlang nun a siamthat ngai tam tak a awm thu a sawi.

Zemabawk North Branch YMA Silver Jubilee lawmna Inrinni a Zemabawk North Basketball Court-a neih a hmanpuina ah Chief Minister chuan ram hmasawn zelna ah kan khawtlang nun a siamthat ngai tam tak a awm thu sawiin, chung zingah chuan hausak thut duh avanga diklo taka sum lakluh pawi tihlohna leh ruihhlo a lansarh thu a sawi a. YMA in a do kawnga hma a lakna chu fakawm a tih thu sawiin, sawrkar leh pawl pakhat emaw, Kohhran ang chauha do hneh theih a nih loh avanga rampum mipui kan thawhho a pawimawh thu a sawi a ni. Chief Minister chuan tun Digital Age, nasa tak maia khawvel in hma a sawnna ah hian chanchin tha aiin chanchin thalo a darh chak zawk tih mai theih tur a nih avanga fimkhur a tul thu pawh a sawi a. Kan ram chungchang sawi hian natna chi hrang hranga a ber kai na te, ruihhlo leh thil dangah a thalo zawnga lan na kan nei fo chu thil pawi tak a nih thu a sawi. Hengte hi thu dik ni mahse, kan chaklohna leh thatlohna sawi te hian siamthat duhna thinlung tihnual a, beidawnna a thlen zawk ang tih erawh a hlauhawm thu a sawi a. Chhiatni thatni a kan intawiawm dan leh tha tam tak kan khawtlang nun a awm te hre reng chungin, Sawrkar, kohhran, NGO leh mipuite pawnfen sawichhingin, khawvel in a entawn tur ni thei kan ni tih hriaa, a beidawng zawnga kal lo leh insiamthaa hmasawn zel tura hma la turin mipuite chu a sawm a ni.

He hunah hian Central YMA President R. Lalngheta pawhin YMA chu Mizo zawng zawng insuihkhawmna, Mizo Inpui a ni tih sawiin, YMA member te'n a humhalh kawngah ke an pen a tul thu a sawi a. Ram in hmasawnna tur tam tak a la neih thu leh a bik takin sum duh luat avanga kut tlinglo a sum lakluh pawi ti lo an tam lutuk chu veiawm a tih thu a sawi a. Hengte hi ram tichhetu a ni tih hriat pawimawh a tih thu sawiin, Ram siamthat hi pawl, Khhran leh sawrkar hruaitu leh hotute kutah chauh awm a nilo tih hre tharin, taimakna, tumruhna leh huaisenna in ram humhalh a, Zonun zemawi vawng nung zel tur kan nih thu a sawi bawk.