Latest News

Serchhip-ah Hunpui vuakvet-a venhimna kalpui dan tur inrawnkhawmna neih a ni

Krismas leh Kumthar vuakvet lo thleng tur mipui ten hlim leh thlamuang taka an hman theihna atan nimin khan Serchhip Police huaihawtin Serchhip-a Police leh Excise & Narcotics Department bakah tlawmngai pawl, VDP leh JAC hruaitu ten inrawnkhawmna an nei.

He inrawnkhawmna Serchhip SP Conference Hall-a neih hi Serchhip SP Stephen Lalrinawma chuan kaihruaiin he huna tel te inlawmna thu a sawi hnuah kan hma lawka Krismas leh kumthar vuakvet lo thleng tur mipui ten him leh thlamuang taka an hman theihna tura Serchhip Police ten Dan leh thupek kenkawhna kawnga hmalak an tum dan tlangpui a sawifiah a. Serchhip khawpui chhungah hian Sailiamkawn atanga Chhiahtlang thlengin December 23, 2022 atanga December 26, 2022 leh December 31, 2022 atanga January 2, 2023 chhungin tlai dar 3:00 atanga zan dar 12:00 thlengin Police Officer Team then hrang hrangte an Duty dawn thu a sawi a, a bikin sawrkar phalloh halpuah leh halmawi chungchangah khauh taka hmalak an tum thu sawiin, heng halpuah leh halmawi te hal lohna khawpui kan nih theihna tura tanrualpui-ah he huna tel te chu a sawm nghal bawk a ni.

He hunah hian Serchhip Sub-Hqrs. YMA President Kawlthuama pawhin mipui ten he hunpui lo thleng tur hi him leh thlamuang taka an hman theihna turin YMA te pawhin theihtawp an chhuah thu a sawi a. YMA Branch hrang hrangte chu anmahni huamchhungah venhimna hna thawk tura an inruahman thu sawiin, heng Branch hrang hrang Duty te hi Sub-Hqrs. YMA hruaitute pawhin an tlawhchhuah dawn thu leh sawrkar in a khap, Halpuah leh halmawi te hal an awmlohna turin hma an lak dawn thu a sawi a. Halpuah leh halmawi hal awm miahlohna Branch te tan lawmman buatsaih a nih dawn thu pawh sawiin, Police te pawhin Prison Van an neih te hman theih turin chhawpchhuak se an duh thu leh hei hian a tha zawnga awmzia a neih an beisei thu a sawi bawk a ni.

He hunah hian hunpui vuakvet-a venhim hna thawh dan tur hrang hrangte sawiho niin Zu leh ruihtheih thil dang hluar chungchang pawh sawiho a ni a, Serchhip-a Asst. Commissioner of Excise B. Ngurchhuana chuan khualzin phur lirthei khalhtute leh Excise Duty ten tul an tih apiang te chu Breath Anyliser hmanga enfiah an nih dawn thu a sawi a. Serchhip SDPO Kaste Romalsawma pawhin Quick Response Team (QRT) leh Police Mobile & Patrolling an neih dan turte a tarlang bawk a ni.

Comments

Popular News (Last 30 Days)