Kum 2 chuang hnuah COVID-19 enkawllai awm lo
Khawvel in a buaipui COVID-19 hri kai hi Mizoram-ah pawh nasa taka buaipui a ni a, January ni 20, 2020 khan China atanga lo haw te Lengpui Airport-ah screening tih tan niin chawlh awm lovin hmalakna chak taka kalpui chhoh a ni a, March ni 24, 2020-ah Mizo-ram-a COVID-19 hri kai hmasa ber hmuh niin May ni 5, 2020-ah enkawl dam hmasa ber ni turin chhuahtir a ni leh a. Hemi hnu ni engemaw chen hri kai enkawl lai leh kai thar kan neih belhloh hnuin June ni 2, 2020-ah positive 12 hmuh belh leh an ni, hemi hnu atang hi chuan COVID-19 hri kai enkawl lai Mizoram-ah kan nei chho ta char char a, nimin khan hri kai hmuh hnuhnung ber chu chhuahtir ni ve lehin ni 927 hnuah Mizoram-ah hri kai enkawllai an awm lo ve ta a ni.
COVID-19 chungchangah Mizoram sawrkar Spokesperson Dr. Pachuau Lalmal-sawma chuan tun dinhmun kan thlen theihna tura sawrkar leh mipuite thawhho thatna leh thuawihna ah lawmthu a sawi a. Naktuk leh mai dinhmun hriat ni lo mahse, hetiang ang hun kan tawn avangin lawmthu a sawi a ni. Mipuite, heng kan thil tawn leh kan lo invawn thianghlim a, hrileng laka kan lo him zel theih nan tan la zel turin a sawm bawk a ni.
Integrated Disease Surveillance Prog-ramme (IDSP) chhinchhiahna atanga a lan danin Mizoram-ah Sample 19,92,528 enfiah ni tawhin COVID-19 hri kai 2,38,964 hmuh an ni tawh a, damchhuak mi 2,38,238 awmin mi 726 ten an thihpui thung a. Hri kai hmuh atanga za zela 99.7 te enkawl dam niin hri kai zinga 0.3 ten an thihpui thung a ni.
Comments
Post a Comment