Tui pump khawl chhia buaipui mek

PHE Department in Tuikum lui atanga Electric khawl hmanga Tui an pump-na khawl chhia thlakna tur khawl chu Serchhip rawn thlenpui ni tawhin khawl thar bun tur hian buaipui mek a ni.
Tuikum lui atanga Khawtetlang Tuizemlian a PHE Department in Tui pump-na atana an hman ber Electric khawl hi Ningani kalta zan khan a parts thenkhat a chhiat avangin Diesel khawl hmang chauh in Tui pump theih a ni a, he khawl chhia thlakna tur hi Company lamah chah nghal niin nizan hmasa khan Silchar thlenpui niin Aizawl-ah lak nghal a ni a, Vawiin khan Serchhip rawn thlenpui leh niin khawl thar hi bun turin Vawiin chawhnu atang khan buaipui nghal a ni.

PHE Serchhip-a Sr. SDO Er. Samuel LR. Ralte chuan khawl thar hi a rawn thlen veleh an buaipui nghal tih sawiin, harsatna dang awm lova an tifel thei a nih chuan zanin lam hian enchhin theih tura an peihfel theih an beisei tih LENKAWL a hrilh a ni. PHE SDO chuan Tui pump khawl an hman chu a rei tawh avangin chhia a awm fo tih pawh sawiin, tun dinhmunah Diesel khawl hmang chauha Tui hi pump theih thu leh mipui mamawh khawp pump theih a nih loh thu a sawi a, hei vang hian Tui renchem a pawimawh thu a sawi bawk.

PHE Sr.SDO chuan Serchhip khawpui chawmna atana Tui lakna siamthat hna hi an theih anga an buaipui mek thu pawh sawiin, tuna chhe mek Electric khawl thlakna tur pawh hi Company lamah Order mek a nih thu a sawi a, hei hi hun reilote ah peihfel theih an beisei tih sawiin, hei hi hman theih a nih hunah chuan khawl thar hmanga an pump theih tawh dawn avangin harsatna thleng thin tam tak chu a zia-awm tawh an beisei thu a sawi bawk a ni.