Latest News

Serchhip District chhunga RBD te tan ni 2 awh Annual Training neih a ni

Serchhip District chhunga Registrar of Births and Deaths te tan ni 2 awh tur Annual Training chu nimin khan Serchhip-ah neih niin Registration of Births and Deaths Act, 1969 chungchang leh piang leh thil chhin-chhiah kawnga hriat tur pawimawh hrang hrang inhrilh tharna neih a ni.

Serchhip DRO Conference Hall-a he training neih hi Serchhip-a District Research Officer Lalthangmawia chuan kaihruaiin Training-a tel te inlawmna thu a sawi a, Serchhip District chhung khaw hrang hrangah leh Damdawi In-ah te Registrar of Births and Deaths mi 49 an awm thu sawiin, an hna chu hna pawimawh leh fimkhur ngai tak a ni tih hriaa a tha thei ang bera thawk turin a chah a. An hna te tha tak an thawh theihna turin sawrkar pawhin kumtin hetiang training hi a buatsaih thin angin heng hun te hi ngai pawimawh turin a chah bawk a ni.


He Training-ah hian Serchhip DRO Office-a Data Processing Assistant (DPA) K. Zodinpuia chuan he huna tel te hi an hnathawhna kawnga pawimawh hrang hrang leh Registration of Births and Deaths Act, 1969 chungchang a zirtir a, Registration of Births & Deaths Act hi kum 1969-a siam niin, State tam zawkah chuan April 1, 1970 atangin kalpui tan a lo ni tawh a, Mizoram-ah chuan he Dan zulzui hian kum 1978 khan Rules duan ve niin July 1, 1985 atanga hmang tanin Registration tih ve chauh a ni a. A tan tir July, 1985-ah hian Aizawl leh Lunglei-ah bul tan chhin niin kum 1986-ah Siaha-ah bul tan leh a ni a, Kum 2000-ah chuan Mizoram-a District zawng zawngah kalpui a ni a. Hemi hnu hian kum 2007 leh 2015-ah he Rules hi siamthat niin tunah hian 2015-a siamthat chu hman mek a ni.

Registration of Births & Deaths Act, 1969 chuan ramchhunga piang emaw, thi emaw an awm chuan Dan anga chhinchhiah (Register) tir vek turin India khua leh tui zawng zawng te a phut tlat a. Piang leh Thi chhinchhiah (Register) a nih rual hian Birth Certificate/Death Certificate pekchhuah nghal zel tur niin Pian atanga ni 21 chhungin pianna hmun RBD hnena report-in (Chhinchhiah/Register tirin) man chawi ngai lovin Birth Certificate lak nghal theih a ni a. Pian atanga ni 22-30 chhunga la tan Late Fee Rs.10/- leh Certificate man Rs. 100/-, a vaiin Rs. 110/- chawi a ngai thung a. Pian atanga ni 31-365 chhungin Thuneitu hnenah phalna lain inziahluh theih a ni bawk a, Rs. 220/- chawi a ngai thung. Hospital-a nau piang te chu register nghal zel an nih avangin a hranpa-in mahni Veng-ah ziahluh kher a ngai tawh lo a ni. Pian atanga kum khat (ni 365) chhunga in register hman lo tan mahni pianna District DC Office atangin Delayed Registration dilna form lakchhuah theih a ni thung. Hetiang bawk hian mitthi te tan Death Certificate pawh lak theih a ni bawk a ni.


Tunhma deuh khan RBD thenkhat in Register-a ziak lut si lovin Birth Certificate an lo pechhuak thin nia a lan thu he hunah hian tarlan niin hetiang hi tih loh tawp tur a nih thu leh Digitized Certificate hman a nih hnuah phei chuan Register-a ziahluh loh chu Certificate pawh nei se a valid dawn chuang lo tih tarlan a ni bawk.

Kumin October thla atang khan Economics & Statistics Office atanga Birth & Death Certificate pekchhuah chu Digitized /Computerised Certificate vek a ni tawh a, hei hi India rampumah pawm vek niin Birth Certificate nei tawh sa tan Search Fee Rs 100/-, Certificate man Rs. 100/- leh Application Form man Rs. 20/-, a vaiin Rs. 220/- chawiin lak theih a ni a, Serchhip-a District Economics & Statistics Office-ah lak theih a ni.

Comments

Popular News (Last 30 Days)