Latest News

Sialhau Bawk Chhoh Golden Jubilee lawmna leh Haw runpui neih a ni

Serchhip District chhunga Sialhau khua chuan Vawiin khan Sialhau Bawk chhoh Golden Jubilee lawmna leh Haw runpui hmangin bialtu MLA leh Minister Er. Lalrinawma chuan khuallian niin a hmanpui.


Vawiin-a he hun hmanna ah hian Er. Lalrinawma hian Sialhau khaw laili, Zawlbuk kawna Jubilee lungphun hawnna a neih hnuin a lawmna vantlang inkhawm Community Hall-ah neih a hmanpui nghal a. He hunah hian khuallian chuan, rambuaiin min tuam avanga khaw tam takin mahni khua kan chhuahsan tih ka hre hlawm a. Chutiang khaw khawm tuar ve tu Sialhau khuain Bawk khawha bul an tan thar lehna "Bawk Chhoh" Golden  Jubilee vawiinah a lawm thei hi thil lawmawm tak a ni. Rambuai vanga mittui nena mahni pian leh seilenna khua chhuahsana, hlim taka Bawk khawh thar leh tura kir leh ta, he khua dinthar lehtu zawng zawngte vawiinah hian zahna chibai ka buka, ka lawmpui em em bawk a ni. Khawtlang an hmangaihna leh an tumruhna zar zovin keinin Golden Jubilee hlim takin kan lawm thei ta a ni, a ti. Heng thiltha zawng zawng hi min hmangaihtu Pathian zarah kan chan a ni tih i hrereng ang u, a ti bawk. Golden Jubilee lawmna hian hmasawn zel tura khawtlang inlungrualna leh inhmangaih tawnna min neihtir se la a duhawm hle a, hmasawn zel turin i dingnghet sauh sauh ang u, a ti bawk. Golden Jubilee lawm ruala haw runpui buatsaih nachang kan hria hi a inhmeh hle a, in hun ropui taka khualliana min sawm hi ka lawm hle bawk a ni, tiin khuallian hian Sialhau mipuite hnenah lawmthu a sawi a. Mizo hnam tana martar-te inpekna hrerengin, ram tana thil tha pakhat tal tih tum theuh ang u, eng hna pawh thawk ila taima leh rinawm taka thawk a, ka hnathawh hi keima tan chauh a ni lova kan ram tan pawh a ni tih thinlunga vawngin hma lam i pan zel ang u, tiin a sawm a ni. 



He hunah hian khualzahawm, Pu Tlangtimawia Zote, DAO Serchhip pawhin thusawiin, Sialhau mipuite duhsakna leh lawmpuina a hlan a. Inlungrualna te, rinawmna leh taihmakna ten rah tha achhuah fo thin tih hriain khawtlang leh ram tana hnathawk thin turin mipuite a sawm a ni.


Sialhau khua hi Mizo ten thlang kan tlaka a nawlpuiin Zoram kan luah chawhnu lam, 1770-1780 AD vel a luah tan niin a lang a. Chhim leh hmar indo kum 1849 atanga 1856 lai vel hi chuan Sialhau hmun hi chhuah san leh niin a lang a, Buanhmun hi Sialhau khaw dai lawka awm a ni. Kum 1861 atangin Sialhau hmunah hian khua din lehin kum 1890 vel thleng an awmleh nia rin a ni. Kum 1898 ah Hmunhlui tlang hi luah leh a ni a, Hmunhlui tlang atang hian tuna an khaw awmna hmun hi kum 1922-24 vel ah an luah tan leh ta a ni. Tun dinhmunah in dinglai 117 awmin, chhungkua 110 leh mihring 602, VC members pathum neiin; zirna lamah Anganwadi atang High School thleng a awm a, Heath Sub-Centre a awm bawk. Kohhran pahnih Presbyterian kohhran leh UPC (NEI) te an awm a ni. 


Lungphun hawnna inkhawm hi zawlbuk kawn ah zing 11:00 am ah hman niin, he hun hi  Pu P.C. Ramtharmawia, Sialhau Welfare Committee, Aizawl in a kaihruai a.  Vantlang inkhawm hi zing 11:30 am ah tanin Pu F. Pazawna Chairman, Jubilee Ogranising Committee in kaihruaiin, Upa Vanlalruata' hun serh a hmang a, PC. Lalduhsanga VCP leh Lalsangzela Vice Chairman, Aizawl Sialhau Welfare Committee atangin thusawi ngaihthlak niin, Pu V. Vanlalduhzuala Asst. Secy,  Organising Committee in lawmthu sawina a nei a ni.

Comments

Popular News (Last 30 Days)