Leisekawt Mual laihzauh leh thildang atan cheng nuai 245 ruahman ah nuai 60.79 la hmang lo
Kum 2019-a Mizoram sawrkar in Serchhip P&E Veng Leisekawt Mual laihzauh leh cheibawl hna a thawh chungchanga RTI hmanga LENKAWL zawhna Sports & Youth Services Department-a SPIO in an chhanna atanga a lan danin Serchhip-a Leisekawt Field laihzauhna atan hian Sports & Youth Services Department atangin SEDP hnuaiah Rs. 2,45,08,000/- ruahman a ni a, he hna hi Mizoram State Sports Council (MSSC) chuan an enkawl thung a ni.
He hna thawh chhunzawm a nih dan chungchanga Mizoram State Sports Council (MSSC) SPIO in RTI hmanga zawhna a chhan danin Sports & Youth Services Department in SEDP hnuaia Rs.2,45,08,000/- ruahman hmanga Serchhip Leisekawt Field laihzauh leh thildang thawh tura a ruahman hi zawhfel a la ni lo a, tuna hna thawh tawh leh sum hman zat tarlan ah Extension of playground by earth Cutting-ah cheng nuai 50 sen niin Cutting of Hillock (Earth Work) and Counterford Retaining wall atan cheng nuai 134.28 hman a ni tawh bawk a, heng hna te hi M/S Malsawm Construction and Consultancy Services, Kulikawn, Aizawl ten an thawk a ni a. Heng hna te hi zawhfel tawh niin a lang thung.
He hna thawh mek thawh chhunzawm zel tur chungchanga zawhna chhangin MSSC-a SPIO chuan tunah hian Construction of Toe wall chu thawh tur la ni a, hemi atan hian cheng nuai 60.79 chu ruahman niin hna hi thawh chhunzawm thuai tur a nih thu a tarlang bawk a. March 31, 2023-ah zawh hman tum a ni ang tih a tarlang bawk a ni.
Serchhip P&E Veng-a Leisekawt Mual hi June 7, 2019 khan Chief Minister Zoramthanga chuan a hmunah tlawhin Field laihzauh hna thawh a tul thu lo thlen a nih angin hna hi tan phawt turin a ti a. October 25, 2019 khan Field laihzauh bul tanna hun hi Sports Minister Robert Romawia Royte hova neiin hna erawh tan nghal lovin thla khat dawn a liam hnu November 21, 2019 khan khawl hmanga laih tan a ni a. January 7, 2020 khan RD Minister Lalruatkima chuan Mual laihzauh hi rawn enfiahin hetihlaia an laih chin bak chu lai chhunzawm tawh rih lo tura tih a ni a. Mual laihzauhna, RD Department ram chu Serchhip in KTP General Conference a thlen zawh veleh ram hauhna atan a hungna siam nghal a nih dawn thu pawh a sawi a. Hemi hnu hian a ko dawlna te siam leh ni mah se lungrem te chimin zawhfel ala ni ta lo a ni.
Comments
Post a Comment