Aizawl a hmasawnna ruhrel din tur hrang hrang Chief Minister hovin TCIL ten an enfiah

Chief Minister Zoramthanga hovin Telecommunications Consultants India Limited (TCIL) hotute chuan nimin zing khan Aizawl khawpui leh a chhehvel hmun hrang hrangah hmasawnna ruhrel lian dinna tur hmun remchang te a en a, Chief Minister hi a kaihnawih sawrkar department hotute'n an tawiawm a ni.

Chief Minister ho hian Hlimen Central Workshop-a Commercial Vehicle tana lirthei chawlhna tur Terminal tur ruahmanna te thlithlaiin, MoRTH atanga sum hmuha helai hmun veka Transport hnathawh mek te en a ni bawk a. Lalsavunga Zoological Park te tlawhin, Chaltlang Tourist Lodge tihchangtlun theih dan tur remchang te dapin en ho a ni bawk.

Heng bakah hian Chief Minister ho hian Chaltlang - Bawngkawn inkar Elevated Road siamna tur TCIL ten Plan an lo siam tawh chu a hmunah Landing awmna tura an ruahman te enfiah a ni a. Zuangtui Godown tlawhin, ruahman anga mipui tan a awlsam zawkna tura sawnchhuah a nih hnuah he hmun hi tangkai zawka hman theih dan tur te sawiho a ni a. Khawpui lo thanglian zelah khualzinmite thlenna tur mamawh belhna te sawilan ni bawkin, a remchan danin neih sa tih changtlun leh a thar sak belh theih dan tur te ngaihtuah zui zel tum a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar